Donald Trump, principal carnada dos spammers no segundo trimestre de ano
martes, 23 de agosto do 2016
Coma sempre, os spammers
e o correo lixo en calquera das súas manifestacións botan man da
actualidade para poñernos diante os seus anzois. Así o vén de
reflectir unha vez máis a compañía de seguridade informática
Kaspersky, que
no seu Informe Spam Q2 Kaspersky Lab 2016 sinala que as eleccións
en Estados Unidos e o controvertido candidato Donald Trump foron os
protagonistas do spam no segundo trimestre de ano. Ademais,
indícase que durante este mesmo período de tempo, o nivel de
mensaxes lixo no tráfico global de correo electrónico foi de 57,3%.
Isto que significa? Pois basicamente (e lonxe do que nos gustaría),
que o spam segue a medrar e ben. De feito, a dita cifra
representa un aumento de catro puntos porcentuais en comparación co
mesmo período do ano anterior e un punto en relación co trimestre
anterior.
Como dixemos, a política
foi un dos asuntos máis repetidos e recorrentes á hora prepararen
os spammers as súas carnadas dixitais. Segundo sinala
Kaspersky, “as vindeiras eleccións en Estados Unidos e os
candidatos implicados ofreceron aos ciberdelincuentes unha boa
oportunidade”. Así, Donald Trump converteuse nun dos temas
recorrentes da maioría dos correos electrónicos non desexados
relacionados coa política. Nestes envíos os seus responsábeis
centrábanse en falar, supostamente, das metodoloxías exclusivas de
Trump para gañar diñeiro. A clave do asunto estaba nunha ligazón
que, en caso de premela, levábanos directamente un portal de
noticias falso. Nel, para empezar a gañar millóns (imitando os
métodos de Trump), convidábasenos a encher cos nosos datos persoais
un formulario na páxina web. O resultado era que non só non
gañabamos un peso con esta xogada, senón que lles fornecíamos aos
delincuentes datos persoais bancarios cos que abrirlles as portas (a
eles si) dunha ganancia ilícita a nosa conta.
Polo que se refire ás
contas de Facebook, no informe dise que sufriron un ataque neste
período cun vídeo de YouTube: un pornovirus publicado desde
unha serie de contas de Facebook comprometidas. Ao tentar reproducir
o vídeo, convidábasenos a instalar un navegador plug-in
titulado Profesjonalny Asystent. Logo, unha mensaxe na
pantalla anunciaba que sen instalar o plug-in non se podía
ver o vídeo, o que abría o camiño para instalarnos ese aplicativo
cando en realidade o que estabamos a facer é abrirlles a porta aos
delincuentes.
Na investigación de
Kaspersky tamén se indica que Estados Unidos mantivo a súa posición
como a maior fonte de correo non desexado co envío do 10,79% do
total. Co 10,10% dos envíos lixo subministrados desde o Vietnam,
este ocupa o segundo lugar na clasificación de países como fonte de
correo non desexado, seguido de India (10,01%). O informe, como
contraste, sinala que no mesmo trimestre de 2015 amosou “unha imaxe
completamente diferente”, con Rusia obtendo o segundo posto (7,82%)
e China ficando en terceiro lugar co 7,14% do spam mundial.