EGATEL mostra na IBC de Amsterdam as súas novas series compactas de transmisores e reemisores
mércores, 5 de setembro do 2018
A
empresa galega EGATEL
recunca este ano na gran feira europea de tecnoloxías de
telecomunicación e transmisión de contidos, a feira
IBC de Amsterdam. A cita será entre o 14 e o 18 de setembro e
nela, a firma de Ourense contará cun stand de seu na caseta
8.B67. Nesta edición da IBC, EGATEL mostrará as series compactas
(até 120Wrms en 1U e de 19 polgadas) TUWH1000 (transmisores) e
RUWH1000 (reemisores de TDT, tamén chamados gap-fillers).
Segundo informa a empresa galega, estas series están preparadas para
traballar en todos os estándares de TV dixital e foron especialmente
concibidas para “satisfacer as necesidades de instalacións de
baixa potencia con limitacións de espazo”.
Ademais,
engade EGATEL, presentan un deseño baseado en plataformas SDR e
incorporan, entre outras vantaxes, un avanzado sistema de
“pre-corrección dixital adaptativa”, amais de excelentes
capacidades de auto-monitoraxe e un potente SW cancelador de ecos
multiestándar no caso dos gapfillers.
A
firma de Ourense tamén engade que ao abeiro destas series compactas,
os equipos de 120Wrms están desenvolvidos con tecnoloxía de alta
eficiencia Doherty de banda larga, “algo único no mercado para tan
baixa potencia”.
Por
certo que os clientes e visitantes tamén poderán coñecer as
solucións de EGATEL para amplificación con topoloxía Doherty
asimétrica en base a un novo transistor con resposta en frecuencia
de 470 a 700MHz que se aplican ás series de EGATEL de alta potencia
TLWH7900 refrixerada por líquido e TUWH4000 refrixerada por aire.
“Con estas solucións de maior potencia por transistor,
increméntanse aínda máis a densidade de potencia e a eficiencia
enerxética”, explica a empresa galega.
A
feira
O
multitudinario encontro Amsterdam a International Broadcasting
Convention (IBC), con sede no RAI Convention Center, é gran feira
europea de telecomunicacións e audiovisual, na que adoitan
participar arredor de 50.000 profesionais procedentes de todos os
recantos do mundo (o máis salientábel do panorama actual da
creación, xestión e fornecemento de lecer e contidos dixitais), e
na que non falta presenza galega en ningunha das súas edicións.
Amais de EGATEL, que é unha asidua do evento, teñen participado
compañías nosas como o operador público RETEGAL ou os fabricantes
Televés e Itelsis.