Económicas da USC amosa aos estudantes principios básicos e avanzados sobre mercadotecnia en liña
luns, 22 de setembro do 2014
A Facultade de Económicas
e Empresariais da Universidade de Santiago vai dar acubillo esta
semana, entre hoxe e o venres 26, a
un curso presencial sobre mercadotecnia en liña. A actividade,
que é de balde, organízase ao abeiro da plataforma Actívate
que vén de lanzar Google, á que se xuntaron numerosas universidades
españolas (entre elas a de Santiago). O curso vai dirixido a
titulados universitarios que busquen emprego. A idea é
proporcionarlles coñecementos amplos e útiles sobre mercadotecnia
dixital “que lles resulten de proveito para unha procura activa de
emprego ou para a posta en marcha da súa propia iniciativa de
mercado”.
O curso, que está
estruturado en 40 horas de formación presencial, que se desenvolverá
en horario de 8.30 a 18.30 horas, inclúe contidos sobre fundamentos
de tecnoloxía e mundo dixital, comercio electrónico, marketing
en redes sociais e dispositivos móbiles, analítica web e
emprendemento.
As persoas responsábeis
de impartir esta actividade formativa introducirán aos participantes
interesados na creación dunha propia empresa nas pautas e nas
ferramentas básicas para facer un plan de negocio. As persoas que
superen con éxito as distintas probas de avaliación obterán
unha certificación en mercadotecnia dixital emitida polo IAB
(Internet Advertising Bureau Spain).