Empresarios e profesionais xuntáronse no Pazo de Mariñán para coñecer novos xeitos TIC de optimizar os seus negocios
venres, 19 de decembro do 2014
A Factoría
de Innovación da Coruña celebrou este
mércores no Pazo de Mariñán (Bergondo) a xornada Aprovéitate
da tecnoloxía, que veu para quedar, unha cita cos profesionais
que serviu entre outras cousas para presentar as potencialidades de
Parnet-TIC 2, un proxecto europeo promovido pola Deputación da
Coruña en colaboración con outras entidades de España, Francia e
Portugal, que emprega as novas tecnoloxías para fomentar a Sociedade
da Información en territorios rurais e promover a creación e
procura de emprego, especialmente na área ambiental. A iniciativa,
díxose, está a xerar xa diversas actuacións, como a posta en
marcha de accións formativas ou a creación dunha plataforma web
onde se amosan ideas, perfís de oferta e demanda e un catálogo de
ferramentas orientadas a aforrar custes ao emprendedor e optimizar os
seus resultados. Tamén abrollou dela unha aplicación móbil de seu
destinada a incentivar a conectividade.
Ademais disto, durante a
xornada (dirixida a amosar perante empresarios e autónomos como
poden empregar as TIC para mellorar a súa produtividade e canles de
venda), celebráronse tres mesas redondas, de maneira simultánea,
nas que se abordaron diferentes ferramentas de utilidade para este
colectivo: os ERP e CRM, as páxinas web corporativas, as redes
sociais e as app, entre outras. Máis en detalle, explicouse
os conceptos de ERP (xestión de negocio) e e CRM (captación e
mantemento no tempo de clientes), cal é o seu custo de implantación
e que tipo de solucións ofrecen para cada tipo de empresa. Tamén se
amosou como empregar a web corporativa e as redes sociais como eixos
estratéxicos dun plan de mercadotecnia, incidindo na importancia de
que a páxina teña unha arquitectura acaida ao cliente, integre as
redes sociais e que os textos sexan claros e directos.
Igualmente, analizáronse
as potencialidades das aplicacións móbiles (app),
recomendando ás compañías que aposten por unha aplicación móbil
no caso de que poida ofrecer contidos exclusivos e alternativos aos
que ofrece a súa web, “porque o investimento derivado non compensa
o beneficio a non ser que ofreza novidade e valor engadido para os
seus usuarios”, fíxose saber na xornada. Nela interviñeron Mariem
Filgueira (Factoría de Innovación da Coruña),
Carlos Alfonso
(Instituto Tecnolóxico de Galicia), Pablo Rodiz (Enxine), María
Regueiro (Asubía) e Óscar Blanco (Partnet-TIC 2).