En marcha Loquieroya.es, unha web tecnolóxica para xente que aborrece a tecnoloxía
martes, 15 de abril do 2014
Esta semana soubemos da
posta en marcha dunha nova web sobre gadgets tecnolóxicos de
potencial e utilidade, sinalan os seus responsábeis, “para
usuarios que saben ben pouca cousa sobre tecnoloxía” e que,
ademais, teñen pouca intención para remedialo. Porén, engádese,
son quen de recoñecer que os gadgets son xa imprescindíbeis
para a maior parte da poboación. A páxina chámase Loquieroya.es
e salienta por achegar claves aos internautas non-techies que
fagan máis doado o camiño cara ao seu trebello ideal: o smartphone
ao mellor prezo para usuarios con poucos recursos, o portátil
máis lixeiro para xente que viaxa, o disco duro para internautas con
moita información que acubillar.
Segundo informan os
responsábeis da web, esta baséase nun descoñecemento xeral e
concreto respecto das TIC: o descoñecemento de moitos usuarios que
non naceron nin medraron na era dixital, que se incorporaron cunha
formación analóxica, pero que precisan recursos que lles axuden a
decidir a súa compra. Loquieroya.es é un proxecto en liña
xestionado por Produtos Editoriais Sanz e que xorde co obxectivo de
situarse “como a web de referencia de tecnoloxía para persoas que
odian a tecnoloxía”. De aí que as súas entradas compartan entre
outras cousas o nexo común da sinxeleza, da familiaridade e dun uso
limitado de termos técnicos. A redacción da web está liderada por
Ángel Francisco Jiménez, profesional con experiencia en revistas de
videoxogos (OK PC, Cibergarmers, Playstation Magazine)
e portais de tecnoloxía como Terra. O equipo componse por
xornalistas seareiros dos gadgets máis novos e con longas
traxectorias no sector.