En marcha un servizo para facilitar a toma de decisión nos comicios políticos: Qvoto.org
martes, 8 de setembro do 2015
Vén de chegar estes días
á Rede o que se presenta como o primeiro servizo en liña en español
que facilita a toma de decisión de face ás eleccións xerais, e
busca facelo “dunha maneira obxectiva, innovadora e de balde”. O
servizo chámase Qvoto.org e a súa arela específica, detallada,
é a de botarnos unha man aos internautas-electores poñendo á nosa
disposición recursos en liña doados de usar que sexan quen de
comparar os nosos ideais políticos con propostas electorais reais e
concretas achegadas polos diferentes partidos que concorrerán nos
vindeiros comicios xerais. Tendo en conta isto, o sistema
forneceríanos o nome da agrupación máis acaida ao noso credo
político e social.
Para tirar partido da
ferramenta, o primeiro que temos que facer é encher unha enquisa que
inclúe unha batería de medidas electorais ante as que podemos
manifestarnos a favor, neutrais ou en contra. Logo, obteremos
decontado o grao de acordo con cada un dos partidos. Asemade, podemos
ver a posición das agrupacións políticas en cada unha das
propostas de Qvoto.
Este servizo, explícanos
Mario García de León Recio, co-fundador do mesmo, susténtase sobre
unha idea que con lixeiras variantes está a coller corpo e a
espallarse por diferentes países europeos: a idea de tirar partido
das máis avanzadas tecnoloxías para comparar as propostas dos
diferentes partidos nos temas máis demandados ou controvertidos. As
tecnoloxías de análise exhaustivo e continuo, xunto coa
concorrencia dunha nutrida comunidade de usuarios, permiten, a xuízo
dos creadores de Qvoto, achegar un elemento novo e máis fiábel cá
habitual toma de decisións baseada nos medios ou os mitins.