Enrique Dans e Domingo Docampo clausuraron os encontros de Mondariz sobre novas tecnoloxías e crise
luns, 24 de outubro do 2011
- Enrique Dans, Luis Cuntín e Domingo Docampo, no transcurso das intervencións do último día das xornadas
Finamente a novena edición dos Encontros de Mondariz-Balneario
confirmouse como un dos grandes foros galegos de debate tecnolóxico-dixital-social
da tempada. O evento, que se desenvolveu a semana pasada da man da Fundación Carlos Casares e
baixo o epígrafe a Sociedade do
Coñecemento alén da crise, xuntou no concello pontevedrés a un importante número
de especialistas, investigadores e xornalistas, sendo un dos seus obxectivos
primordiais saber até que punto as novas redes nos poden axudar no camiño da
xustiza social, a democracia real e o reparto da riqueza. Logo das primeiras
sesións, que
reflectimos en todo detalle, os encontros chegaron á súa recta final co
presenza de Enrique Dans, Domingo Docampo, Gustavo Garrido e María Tesesa
Pisano.
Polo que atinxe á intervención do galego Dans, autor dun dos blogs máis seguidos do panorama en
liña estatal, dicir que un dos piares do seu relatorio, presentado co título Política e disrupción: unha sociedade
diferente, foi o antes e o despois que se crea cada vez que se achega un
elemento tecnolóxico útil e mellor que os precedentes. E, tamén, as
dificultades que se dan nalgúns sectores á hora de asumir o cambio de forma e o
potencial cambio de contido. Ao seu xuízo, “cando
alguén ofrece un produto máis intuitivo e con mellores prestacións, a xente
acaba por asumilo de xeito irreversíbel; pasou co iPod, coa Wikipedia e coa
tableta electrónica: os tres produtos significaron unha disrupción e sufriron
ou sofren reaccións na súa contra que polo normal veñen de fóra, nunca do
mercado que crean”. Na súa opinión, en política acontece o mesmo: “En vez de asumir a disrupción, continúase
enviando a mesma mensaxe pola nova ferramenta”.
A última xornada dos encontros tamén contou coa presenza de
Domingo Docampo, catedrático de Teoría do Sinal da Universidade de Vigo, quen falou da lectura dixital e das súas
consecuencias, amais da necesidade que temos de asumir que o importante é a
lectura en si mesma, e non o soporte. “Cando
a xente se afaga a ler na tableta dixital, rematará por fin a polémica, unha
polémica, por outra banda, moi interesada”, comentou. Pola novena edición
desta xuntanza tamén pasaron Gustavo Garrido, director da Fundación Carlos
Casares e máis María Teresa Pisano, delegada especial do Estado no Consorcio da
Zona Franca de Vigo. O primeiro dos relatores comezou a súa achega agradecéndolles
aos asistentes “o alto nivel amosado nas
intervencións dos coloquios cos relatores”, así como aos patrocinadores
polo seu apoio nesta xuntanza. Pola súa parte, María Teresa Pisano salientou a
calidade do programa e dos conferenciantes convocados, ao tempo que fixo un
repaso por todos os temas tratados durante as xornadas, facendo saber que “estamos a ser testemuñas dun cambio
importante a nivel global, onde a palabra que máis se escoita é incertidume,
por mor das transformacións que xeran oportunidades, pero tamén ameazas”. Ao
seu xuízo, estes cambios están a operarse cunha velocidade considerábel, e cun
alcance transversal, no contexto dunha crise que nos afecta a todos,
circunstancia que, de contarmos novas tecnoloxías coas debidas perspectivas de
humanización, podería ir chegando ao seu remate.