Firefox OS despedirase dos smartphones o 30 de maio

A Fundación Mozilla recoñeceu hai un par de meses que tiraba a toalla cos móbiles con Firefox OS, considerando que esta tecnoloxía fracasou na súa forma actual (nin os smartphones conseguiron ser especialmente económicos, nin resultaban de utilidade ao carecer de aplicacións esenciais en moitos mercados como WhatsApp) e agora fan oficial a súa decisión anunciando que cesarán o desenvolvemento de Firefox OS tras o lanzamento da versión 2.6 (prevista para o 30 de maio).
Pero cómpre lembrar que o cesamento do desenvolvemento de Firefox OS para smartphones non quere dicir o adeus de Firefox OS, senón que o sistema operativo mudará a súa estratexia e buscará aplicarse a dispositivos conectados, como poderían ser os televisores ou produtos para a Internet das Cousas. Ou sexa, que o sistema operativo de Firefox busca explorar territorios afastados dos dominados por Android e iOS, coa intención de continuar a promover os desenvolvementos de aplicacións baseadas en tecnoloxías web.