Francisco Botas amosa en Santander a folla de ruta dixital de Abanca
venres, 1 de xullo do 2016
O conselleiro delegado de Abanca, Francisco Botas,
estivo este xoves 30 en Santander para participar no seminario
Desafíos da economía española, curso organizado pola
Universidade Internacional Menéndez Pelayo co obxectivo de avaliar
as expectativas actuais do país a través de “reflexións de
destacados persoeiros da vida económica”. Baixo
o título de A banca na era dixital: innovación e evolución,
o relatorio presentado por Francisco Botas estivo centrado no proceso
de transformación que a tecnoloxía, en combinación con outros
factores, está a impulsar no sector financeiro. Na súa opinión,
no novo escenario os bancos pasarán de ser fornecedores de
transaccións e provedores de servizos financeiros a desempeñar un
papel máis relevante e proactivo na vida diaria dos seus clientes
“cun enfoque clientecéntrico” a través da “fórmula
omnicanle”.
O conselleiro delegado lembrou que entre os fitos
que van marcar os vieiros do tecido bancario a curto e medio prazo
atópanse os seguintes: “A evolución tecnolóxica e de experiencia
dos consumidores, a presenza de novos actores (grandes tecnolóxicas
e startups fintech), a prevalencia de tipos en mínimos e a
intensidade regulamentaria”.
Ao seu xuízo, a transformación das entidades
financeiras tradicionais en bancas dixitais “non é só unha
cuestión de eficiencia e transacción, senón que require
transformar o modelo de negocio e relación co cliente, así como
novos recursos e capacidades en tecnoloxía, procesos e persoas”.
Neste senso e con estes obxectivos, sinalou, débense afrontar retos
como o aproveitamento intelixente da información masiva, o que se
coñece como Big Data, “elemento clave para xerar unha
oferta de valor para o cliente”. Asemade, enumerou os seguintes
desafíos a acometer: as novas necesidades tecnolóxicas derivadas do
incremento das transaccións e os requirimentos de ciberseguridade, a
creación dunha experiencia de cliente única para as diferentes
canles dixitais e físicas (cun novo papel para a oficina bancaria) e
a implantación dunha cultura innovadora que “xere unha nova forma
de traballar nas organizacións”.
Sobre as actuacións concretas da compañía galega,
Botas dixo que a entidade financeira “está a adoptar unha visión
clientecéntrica para situarse como unha das bancas de referencia a
través dun novo modelo de distribución omnicanle ao redor de
diferentes canles como a oficina bancaria, a banca móbil, as
oficinas a tempo parcial, as redes sociais, a banca electrónica,
etc”. Ao fío disto, lembrou a implantación dunha nova axenda
dixital baseada en tabletas Microsoft Surface con alta mobilidade e
unha nova sistemática comercial que permiten un seguimento máis
próximo. Ademais, a través da aplicación do Big Data,
sinalou, Abanca “está a incrementar a súa capacidade para
xestionar información, aproveitar fontes externas e explotar datos
desestruturados”.
Polo que respecta á experiencia do cliente,
recordou que a entidade galega dispón “da aplicación móbil de
banca electrónica mellor valorada do mercado español por axilidade
e prestacións” (estudo Mobile Banking Spain 2016) e avanza “cara
á posibilidade de contratación 100% on-line dos seus
produtos”. E engadiu: “A entidade dispón de solucións propias
para retirar diñeiro ao instante sen necesidade de tarxeta nin
transferencias (Abanca Cash) e enviar diñeiro axiña e doadamente de
móbil a móbil sen número de conta (Abanca Pay)”. Ademais foi a
segunda entidade europea en ofrecer o servizo de pago vía móbil
Samsung Pay.
Fixo saber, por último, que a empresa investiu 82
millóns de euros en innovación e tecnoloxía. Ademais, dixo, o 40%
dos clientes son usuarios dos servizos de banca electrónica, cun
incremento de 8 puntos no último ano.