GPUL convoca este xoves aos seareiros do hardware libre nun novo HackLab de Impresión en 3D
mércores, 25 de marzo do 2015
O Grupo de Programadores
e Usuarios de Linux, GPUL, vaille dar continuidade ao HackLab
de Impresión en 3D que
celebrou o pasado mes de outubro. A
nova sesión, que amplifica e completa o acadado na primeira
xeira, celébrase este xoves 26 no laboratorio 0.1w da Facultade de
Informática da Coruña, das 17.00 horas en adiante. O obxectivo,
novamente, é posibilitar un achegamento directo a unha realidade que
nos colle de preto, queirámolo ou non: a rápida e ampla evolución
do hardware libre nas nosas vidas. Desta evolución xorden
precisamente as impresoras 3D e proxectos como Clone
Wars, que documentan como crear a nosa propia impresora, sinalan
dende GPUL.
A idea do
HackLab
deste xoves é a de “crear un grupo de traballo cooperativo de
carácter aberto e fomentando a aprendizaxe autónoma e cooperativa
de tódolos membros”. Segundo avanza a organización, é
aconsellábel que os participantes na xornada que teñan unha
impresora para montar acudan ao evento con ela, co fin de
“aprendermos xuntos como funciona este ámbito de traballo”.
Como
lembraremos, baixo o paraugas da impresión en 3D acubíllase un
feixe de tecnoloxías emerxentes que implican a
materialización de obxectos en tres dimensións mediante a impresión
por superposición de capas sucesivas. E todo, en circunstancias
normais, máis barato e eficaz que calquera outra tecnoloxía de
fabricación por adición.