GPUL mergullará aos estudantes en software libre co seu novo Summer of Code
xoves, 26 de maio do 2016
O
Grupo de Programadores e Usuarios de Linux (GPUL) proseguirá
este verán co seu importante traballo a prol da promoción e o
desenvolvemento de software libre na nosa terra. Puidemos ver boa
parte deste compromiso pola tecnoloxía sen cancelas nos GPUL
Labs, segundo nos conta a organización “un éxito de
participación e resultados”, con case medio milleiro de asistentes
dando forma, nos diferentes obradoiros programados, á Galicia open
source do futuro (a nosa terra como factoría colaborativa de
ferramentas abertas). Agora GPUL recunca coa iniciativa GPUL
Summer Of Code, un programa formativo que permitirá aos
estudantes con arelas de “aprender e involucrarse en proxectos de
software libre” desenvolver unha aplicación real, “made in
Galicia”, coas máis modernas tecnoloxías. Tecnoloxías libres e
co apoio e seguimento de GPUL.
Asemade,
os alumnos disporán dun espazo de seu para traballar no
despacho de GPUL na Facultade de Informática da UDC. Por outra
banda, poderán recibir asesoramento para presentar o proxecto ao
Concurso
Universitario de Software Libre e ao Premio
ao mellor TFG de Software Libre, amais de recibir unha
retribución de 400 € mensuais durante os 3 meses de duración no
tempo do programa.
Para formalizarmos a
inscrición só é preciso enviar un correo á conta info@gpul.org,
co currículo/LinkedIn, o expediente académico e a conta de GitHub
ou un anaco de código que desenvolveramos previamente (a xeito de,
por exemplo, práctica de carreira).
A intención de GPUL
coa nova edición do seu Summer of Code é converter o programa nun
referente a nivel local dentro da programación aberta, amais de
animar a outras entidades a impulsar accións semellantes e crear,
todos xuntos, unha cultura de desenvolvemento libre na comunidade
galega.