Galicia acada o segundo posto na clasificación de universidades a prol do software libre
xoves, 15 de maio do 2014
O obvervatorio
PortalProgramas vén de publicar a súa acostumada clasificación
sobre as institucións académicas superiores do Estado que máis se
mollan pola programación aberta, unha clasificación na que, como
lembraremos, os nosos sete campus teñen salientado e moito. Agora
toca a terceira edición da listaxe, este Ranking
de Universidades en Software Libre (RuSL 2014), e semella que
a UVigo, a USC e a UDC seguen a ter un peso importante en materia de
divulgación, impulso e adopción de ferramentas con código aberto.
De feito, a da Coruña
ocupa o cuarto posto da listaxe, a de Santiago o sexto e a de Vigo o
décimo. Todo un logro para as nosas institucións e un pulo
importante para o software libre na nosa terra, software sen
barreiras de licenza, especialmente acaído para núcleos emerxente
de produción TIC (coma o noso) e para uns tempos de orzamentos
limitados (os programas abertos implican en case tódolos casos
menores custes).
Volvendo ao ranking
en cuestión, dicir que se centra en amosar as universidades do
ámbito estatal máis comprometidas co uso e a difusión deste tipo
de programación informática. Este 2014 volve como vencedora a
Universidade de Granada, seguida pola Universidade da Laguna
(Tenerife) e a Universidade de Las Palmas de Gran Canaria. A
continuación e case de xeito sucesivo, veñen as tres universidades
galegas. Por comunidades, a primeira clasificada é Illas Canarias,
seguida de Galicia e Aragón.
Os ámbitos onde máis
destacan as universidades en canto ao software libre son o
asesoramento a empresas e administracións públicas, a implantación
tecnolóxica do software libre nos programas dos centros e os plans
de apoio do código aberto a nivel institucional.
O RuSL é un estudo
realizado polo Observatorio Tecnolóxico PortalProgramas, que conta
coa colaboración dun equipo expertos en software libre e
responsábeis das principais universidades españolas (como Ricard
Faura i Homedes, xefe de Servizo de Sociedade do Coñecemento na
Dirección Xeral de Telecomunicacións e Sociedade da Información,
Generalitat de Catalunya). Foron analizadas 76 universidades
españolas baixo 65 criterios repartidos en 11 ámbitos diferentes.
O obxectivo do RuSL é “o
de axudar na promoción do software libre na sociedade, facendo
especial fincapé no apoio preciso por parte do sistema educativo”.
Este ano ampliouse este estudo ás universidades de Estados Unidos,
cuxos datos se atopan dispoñibles na páxina web do OsuR.
PortalProgramas.com
(impulsores deste e máis estudos sobre software libre) é un portal
web de guías e descargas de software multiplataforma, con 10 anos de
experiencia e máis de 300 millóns de descargas realizadas.