Gonzalo Sotelo, recoñecido nas Xornadas Penitenciarias Lucenses que comezan hoxe
luns, 26 de setembro do 2016
- Gonzalo Sotelo, responsábel da unidade de delitos tecnolóxicos da Gardia Civil de Pontevedra, nunha imaxe de G. Santos para El Faro de Vigo
Hoxe comezan en
Lugo, no salón de actos da sede da Deputación, as XXX
Xornadas Penitenciarias Lucenses organizadas pola Asociación
Penitenciaria Concepción Arenal.
No marco desta actividade, orientada
este ano a informar ao detalle da problemática de Os menores e
as novas tecnoloxías, entregaranse
contra as 19.00 horas as medallas da asociación, dirixidas a
salientar o importante labor social levado a cabo na nosa terra por
entidades, colectivos e persoas. Entre as galardoadas atópanse a
Fundación San Rosendo (polo seu labor de integración e
participación a prol das persoas maiores e en risco de exclusión),
o maxistrado José Antonio Vázquez Taín, a Asociación Lucense de
Axuda a Enfermos Mentais (ALUME), a artista lucense Noemi Mazoy e a
Fundación ALAR Galicia. Tamén se vai distinguir o importante labor
levado a cabo por Gonzalo Sotelo, responsábel do Equipo
de Investigación Tecnolóxica pertencente á Unidade Orgánica de
Policía Xudicial da Garda Civil de Pontevedra.
Sotelo, que dende 1999
dirixe a liña de investigación tecnolóxica con menores
involucrados, participará tamén como relator.
As xornadas
As Xornadas
Penitenciarias Lucenses desenvólvense os días 26, 27 e 28 de
setembro baixo o epígrafe Os menores e as novas tecnoloxías.
Segundo informa a asociación, “logo de trinta anos organizando
estas xornadas, seguimos a procurar cuestións de actualidade que
estean a xerar repercusión e interese social”, e para o presente
ano decidiuse abordar o ámbito das novas ferramentas na nenez e na
adolescencia, “entre outras cousas debido ao forte desenvolvemento
teórico-práctico experimentado pola cuestión ao longo dos últimos
anos, e debido tamén á gran dificultade que supón a súa detección
e abordaxe”. A isto cómpre engadir a importante sensibilidade
social que esperta este fenómeno e que afecta, en todos os niveis, a
un meirande número de poboación no ámbito estatal, engade a
entidade penitenciaria.
As xornadas están organizadas pola
devandita asociación e contan para o seu desenvolvemento co apoio
(financiamento) do Concello e a Deputación de Lugo.
Arrincan este luns 26 de
setembro no salón de actos da sede da Deputación de Lugo,
contándose coa presenza de Álvaro Santos Ramos, vicepresidente do
organismo provincial. A continuación celebrarase a dita entrega de
medallas e logo comeza a conferencia Os menores e os delitos
informáticos a cargo de José Antonio Vázquez, maxistrado do
Xulgado do Penal número 2 da Coruña. Presenta e modera Félix
Mondelo Santos, decano do Colexio Provincial de Avogados de Lugo.
Ao
día seguinte, 27, no mesmo escenario, celebrarase ás 19.30 horas a
conferencia Prevención e loita contra os delitos informáticos:
especial referencia aos menores. Será impartida por Gonzalo
Sotelo, responsábel do Equipo de Investigación Tecnolóxica da
Garda Civil de Pontevedra. Presenta e modera Víctor Souto, capitán
da Unidade Orgánica da Policía Xudicial da Garda Civil de Lugo.
Xa
no último día de actividades, o 28, desenvolverase a conferencia
Metodoloxía Coaching: Medida de intervención eficaz con menores
en risco. Virá da man de Fernando González Truque, director de
Alar Galicia. Presenta e modera Óscar Piñes Penelas, director do
Centro de Menores Santo Anxo de Rábade. A clausura das xornadas
correrá a cargo da alcaldesa de Lugo, Lara Méndez.