Gradiant desenvolve tecnoloxías para optimizar e axilizar o estudo das secuencias de ADN
martes, 25 de novembro do 2014
O Centro
Tecnolóxico Gradiant está a informar dun proxecto de seu
directamente encamiñado a solucionar os problemas inherentes ao
manexo de sistemas de datos NGS (Next Generation Sequencing),
que son tecnoloxías de estudo de datos de secuencia masiva de gran
potencial para o coñecemento a todos os niveis das cadeas de ADN.
Máis polo miúdo, do que trata o traballo de Gradiant é, en boa
medida, de axudar a atopar pequenos pero relevantes detalles de
información no medio de extensas chairas de coñecemento xenómico.
Por exemplo, detectar mutacións que abranguen múltiples bases do
xenoma (como macroinsercións ou macrodelecións) nun contexto no que
só unhas cantas rexións do ADN son secuenciadas.
Segundo lembra Gradiant,
a investigación apóiase directamente nos devanditos sistemas NGS e
na súa optimización. “Estas plataformas”, explica a
investigadora Lorena Castro, “a diferenza das técnicas
tradicionais de estudo, son quen de xerar paralelamente e de xeito
masivo, millóns de anacos de ADN nun único proceso de secuencia a
unha velocidade moito maior e cun custe cada vez máis reducido”.
Polo tanto, o seu alto rendemento está a xerar o auxe de novas
aplicacións e probas biolóxicas, o que xunto con pulo de novos e
avanzados métodos bioinformáticos, “provoca un cambio no
paradigma diagnóstico”, engade a investigadora.
O problema ante o que se
atopa todo este desenvolvemento é en parte un problema de cantidade.
Ou sexa, que os procesos xeran, como era de agardar, inxente número
de lecturas, co que se fan precisos recursos que favorezan o manexo e
a interpretación dos resultados. Segundo Lorena Castro, trátase dun
pescozo de botella de botella, aplicábel non tanto no secuenciado do
ADN en si, senón máis ben na xestión e a análise que abrolla dos
sistemas e as plataformas. Ou sexa, que é difícil separar o gran da
palla na inxente maré de información en bruto. A cousa aínda é
máis complexa se temos en conta a natureza descontinua de certos
datos. Dito doutro xeito: en circunstancias normais, só se pode
atopar a agulla cando se dispón de toda a palla. Porén, avaliar
toda a palla segue a ser en moitos ámbitos inviábel.
O proxecto de Gradiant
diríxese a superar este tipo de atrancos. Foi posto en marcha en
colaboración coa Unidade de Diagnóstico e Tratamento de
Enfermidades Metabólicas Conxénitas (UDeTEMC) do Servizo de
Pediatría do Hospital Clínico Universitario de Santiago CHUS,
especializada en investigación e desenvolvemento de ciencias
biomédicas. A investigación inclúe o desenvolvemento dun “pipeline
bioinformático” que permita servir como punto de partida para o
diagnóstico de doenzas metabólicas e neurodexenerativas conxénitas.
“O deseño deste pipeline”, aclaran dende Gradiant,
“permitirá optimizar o tempo e aumentar a fiabilidade da análise
dos datos xenéticos mediante a detección de distintos tipos de
mutacións e o filtrado das mesmas segundo o seu grao de
patoxenecidade, permitindo así desenmascarar con rapidez e confianza
as variantes xenéticas que xacen baixo unha enfermidade”.
Por certo que este tipo
de melloras na medicina xenómica ten especial potencial en cuestión
como a detección precoz de doenzas raras ou na obtención de
prognósticos precisos, ou na redución de custes en diagnósticos e
tratamento.