Gran presenza das TIC entre as 70 firmas que optan ao premio empresarial da Deputación da Coruña
venres, 13 de xaneiro do 2017
A Deputación da Coruña convocou a primeira
edición do Premio á mellor iniciativa empresarial, un recoñecemento
que, como se indica no seu nome, vai dirixido a salientar e
visualizar o traballo ben feito en materia de emprendemento e
innovación no ámbito da provincia. Segundo salienta a entidade que
preside Valentín González, rematado
o prazo de presentación de candidaturas, un total de 70 firmas optan
finalmente ao devandito galardón, unha boa parte delas pertencente
ao sector das novas tecnoloxías da información. Segundo
explicou o presidente da Deputación, do que se trata é de
"recoñecer o traballo realizado polas pequenas empresas,
autónomos e emprendedores comprometidos co desenvolvemento da
provincia da Coruña”. O premio será de 50.000 euros e artéllase
en dúas categorías.
A primeira modalidade (25.000 euros) está
destinada a novas iniciativas empresariais, cunha traxectoria de
menos de doce meses dende o inicio da súa actividade. Nesta
modalidade concorren un total de 46 empresas. Na segunda categoría
do galardón, tamén cunha dotación de 25.000 euros, participan dúas
ducias de firmas e recoñecerase á mellor iniciativa consolidada,
con máis de cinco anos de experiencia.
Segundo informa a Deputación, os eidos de
actividade das aspirantes son “moi variados”, destacando “as
empresas relacionadas coa aplicación das novas tecnoloxías da
información e a comunicación e as dos sectores turístico, do
transporte e do comercio, así como empresas especializadas do sector
alimentario, en especial na produción e comercialización de
produtos ecolóxicos”. Entre os criterios que se terán en conta
para a concesión do premio figuran cuestións como o grao de
innovación, a creatividade da idea de negocio, a creación de postos
de traballo, a estratexia comercial e as perspectivas de medre, no
caso das empresas con menos de 12 meses de existencia. No caso das
consolidadas atenderase a parámetros relacionados co medre da
facturación, a capacidade de espallamento alén da nosa terra, o
grao de innovación, as boas prácticas de xestión empresarial e
políticas de responsabilidade social corporativa ou a presenza
feminina na empresa, entre outras cuestións.
A Deputación agarda facer público o fallo deste
primeiro Premio á mellor iniciativa empresarial coruñesa durante o
primeiro trimestre de 2017.
