Hackity App, unha aplicación participativa para mellorarmos a nosa cidade
mércores, 16 de xullo do 2014
Poden as novas
tecnoloxías combater a tiranía dos coches nas cidades? Segundo dan
a entender os impulsores do estudo
de deseño social Hackity, non é que podan por si mesmas, pero
axudan. En primeiro lugar porque para empregarmos as novas
tecnoloxías sociais, queirámolo ou non, temos que comunicarnos e
dialogar, e isto adoita estar nas antípodas de todo o que ten que
ver con conducir (incomunicación, falta de diálogo e de
entendemento, cada un por libre no seu coche, etc). O estudo Hackity
quere facer algo semellante á política participativa que promulgan
certos grupos pero aplicado á evolución das cidades nas que
vivimos. Con este obxectivo teñen entre mans unha aplicación en
desenvolvemento pero xa descargábel e usábel: Hackity
App.
A través dela, din,
podemos
compartir cos demais a nosa visión da urbe ou barrio no que
habitamos: o que nos gustaría mudar, o que nos gustaría que
deixaran estar.
A listaxe de cousas que
podemos facer é infinita, se o pensamos ben. Dende dar conta dun
parque infantil en mal estado ou dun paso de peóns mal disposto até
dos puntos das estradas urbanas onde os coches circulan por enriba da
velocidade permitida. Os responsábeis da aplicación xa amosaron a
súa arela de conseguir a implicación directa de administracións e
asociacións de veciños, incrementando ao máximo a comunicación
entre as primeiras e as segundas, e entre elas mesmas tamén. O
obxectivo é acadar diálogo e información, e que os datos xerados
sexan de valor para asociacións, concellos e colectivos dende o
primeiro intre en que os soliciten. Até o de agora, as iniciativas
de Hackity xa foron levadas á práctica nos barrios madrileños de
Santa María de La Cabeza e Puerta del Ángel, e a resposta “foi
moi boa”, sinalan. A intención é ampliar a iniciativa a outras
zonas da capital do Estado e mesmo a outras cidades. Este labor de
promoción e divulgación faise a través dos Hackity Dinner,
que son encontros convocados a través das redes sociais para hackear
unha cidade entre todos os participantes. Hackear no sentido
de intervir positivamente. Por exemplo, achegando colectivamente
diñeiro para amañar un problema concreto a contorna urbana.