Hoxe celébrase o 25 aniversario da publicación de Linux
xoves, 25 de agosto do 2016
Os días pasados falamos
en Código Cero da celebración dos 25 anos da Web, pero a liña
de celebracións TIC non remata aí esta tempada. Nunha das máis
salientábeis dáse a significativa circunstancia de festexar, tamén,
25 anos anos de andaina. Trátase
da celebración do sistema operativo Linux, que chega aos cinco
lustros de “idade” esta semana, xa que foi tal día coma hoxe
(un 25 de agosto de hai 25 anos) cando Linux Benedict Torvalds,
estudante de Ciencias de Computación en Helsinki, anunciou perante a
comunidade do software libre (que xa existía dende aquela e dende
moito antes) o lanzamento dun sistema operativo libre, “deseñado e
publicado por afección”, para os procesadores 80386 e 80486 de
Intel, e que “malia non ser tan grande e profesional como GNU, si
que servirá para computadores 386”.
Tratábase do sistema Linux, un dos grandes piares
do movemento open source dos nosos días e, tamén, un dos
grandes piares do tecido informático mundial en termos xerais.
Como dixemos, un dato certamente curioso da
publicación do sistema libre é que Linus Torvalds amosouno perante
o mundo como un simple hobby. Porén, malia estes humildes
inicios, a ferramenta foi medrando e ramificándose até converterse,
nos nosos días, en recurso básico para o bo funcionamento de
grandes multinacionais como Google, Amazon ou DreamWorks (entre
outras moitas) ou entidades de primeira liña como a Bolsa de Nova
York, a NASA ou a Bolsa do Brasil. Ademais, é o miolo e a orixe dos
máis de 1.400 millóns de teléfonos con sistema Android. De feito, segundo datos recentes, calcúlase que
case o 99% das supercomputadoras del mundo tira partido do sistema
Linux.