ICT-Go-Girls apunta á necesidade urxente de atraer ás mozas ás TIC dende a Secundaria
venres, 2 de xaneiro do 2015
- Unha das actividades do proxecto realizadas na sede do CESGA en Santiago
O proxecto europeo ICT-Go-Girls!
rematou a súa andaina de forma oficial o pasado 30 de outubro de
2014. A iniciativa, que foi coordinada pola área de e-learning
do Centro de Supercomputación de Galicia, dirixiuse a achegar ás
nenas de Secundaria os coñecementos, habilidades e valores para
axudalas a crear e obter innovación e emprego de calidade nas TIC. O
día 15 de outubro, celebrouse en Amberes (Bélxica) a conferencia
final do proxecto, onde, cunha participación en local e a través da
rede, concorreron 150 persoas nunha sesión onde se presentaron as
conclusións máis importantes e desenvolvéronse diversos obradoiros
prácticos sobre posibilidades de levar as TIC á aula de forma que
sexan máis atractivas para as alumnas dos primeiros cursos de
educación primaria.
Como lembraremos, o proxecto de innovación educativa ICT-Go-Girls!,
co-financiado pola Unidade de Aprendizaxe Permanente da Comisión
Europea, reuniu a expertos investigadores de 5 países (CESGA e USC
da nosa terra, Universidade do Danubio e Die Berater de Austria, a
Universidade Spoleczna Akademia Nauk de Polonia, o Instituto
Fraunhofer IAO de Alemaña e o centro de formación CVO Antwerpen de
Bélxica) para analizar e deseñar métodos e recursos de soporte ás
escolas europeas e mellorar o modo no que se abordan as TIC nos
primeiros anos da Secundaria. A idea era animar a alumnas e alumnos a
adquirir habilidades emprendedoras e interese polas carreiras e
empregos relacionados coas novas tecnoloxías.
O proxecto estaba dirixido a estudantes dos primeiros cursos de
Educación Secundaria (de idades entre os 10 aos 14 anos) e os seus
profesores e profesoras nas escolas europeas, para tratar de reverter
a tendencia negativa que fai que só un 30% do sector TIC estea
formado por mulleres, e que ademais, só supoñan un 19% nos ámbitos
de decisión deste sector, un dos máis activos, diversos e con
posibilidades de emprego a nivel mundial. A Comisión Europea calcula
unha carencia de 900.000 traballadores formados en TIC en Europa para
o ano 2020, “polo que lograr unha maior participación das mulleres
neste sector resulta crucial”, informa ao CESGA reflectindo
declaracións da Comisión.
Os resultados do proxecto poden ser consultados nunha guía en 5
idiomas: Manual para Centros Educativos. Promovendo o espírito
emprendedor a través das TIC. Este manual é unha
guía práctica de 40 páxinas que resume as actividades, achados,
barreiras e recomendacións para mellorar o número de mulleres
traballando no sector do TIC desde a Educación Secundaria. Está
dispoñible en
formato PDF desde a propia web do proxecto ou en formato papel,
que se pode solicitar ao CESGA. Ten unha licenza Creative Commons
Attribution Share Alike, polo que pode ser utilizado, adaptado ao
contexto de traballo particular. O manual inclúe un CD con materiais
extra, documentación do proxecto, material de difusión, e mesmo o
código da rede social empregada na iniciativa, baseada en
desenvolvementos de software libre Elgg e SocialWire.
Como lembraremos, o proxecto ten a súa continuación no marco do
Plan Proxecta, da Consellería de Educación da Xunta de Galicia,
cunha iniciativa denominada Rapazas Emprendedoras nas TIC,
onde se propón levar á práctica diferentes proxectos de aula coa
referencia e apoio dos materiais do proxecto europeo. Esta iniciativa
conta co apoio da Secretaría Xeral de Igualdade da Xunta de Galicia,
así como outras institucións como o Colexio Profesional de
Enxeñeiros Informáticos de Galicia, AGASOL, USC, UDC e UVigo.