Inaugurada en Compostela a Lonxa de Financiamento ACEint

Este primeiro de xullo inaugurouse en Santiago a Lonxa de Financiamento ACEint, organizada polo IGAPE para facilitar aos promotores de once proxectos empresariais de Galicia e Norte de Portugal o acceso a financiamento de investidores institucionais ou particulares. Na apertura participou o director de Xesgalicia, Juan Cividanes, que salientou que a iniciativa insírese nun proxecto de colaboración co país luso que está a ofrecer tamén un sistema de alertas e oportunidades de negocio para empresas do sector das novas tecnoloxías. No encontro, desenvolvido na Cidade da Cultura, houbo un relatorio do promotor dos estudios galegos de videoxogos Gato Salvaje, Fernando Prieto, sobre a forma en que unha startup consegue financiarse a través de capital risco e crowfunding.
A seguir, os promotores dos once proxectos seleccionados no marco do proxecto de cooperación transfronteiriza ACEINT presentaron as súas iniciativas diante dos investidores presentes na Lonxa. A xornada incluíu ademais unha mesa redonda sobre as posibilidades de financiamento dos investimentos TIC. Participaron neste debate representantes do IGAPE, de Xesgalicia, do Club de investidores de Clúster TIC Galicia, de Unirisco/Uninvest e de AFIGAL.
O proxecto ACEint, no que tamén traballan a Universidade de Santiago e a axencia de desenvolvemento portuguesa BICMinho, está financiado polos fondos europeos FEDER ao abeiro do Programa de Cooperación Transfronteiriza España-Portugal e ten como obxectivo impulsar a creación, o desenvolvemento e a internacionalización de empresas TIC, coa finalidade de que actúen como catalizadores da competitividade na contorna Galicia-Norte de Portugal. “Neste ámbito de cooperación”, informa o IGAPE, “estanse a pór en marcha varios servizos e recursos para as empresas lusas e galegas que desenvolvan a súa actividade ou liñas de negocio no sector das TIC, mellorando o acceso a información, asesoramento e formación á medida para o sector”.