Ineo xuntará os nosos profesionais referentes no mundo para que nos conten as súas experiencias
xoves, 29 de setembro do 2016
A vindeira semana, os
días 6 e 7 de outubro a asociación Ineo (a alianza de empresas
galegas do sector TIC) organizará na sede de AFundación (no 24-26 da rúa
Policarpo Sanz de Vigo) un foro de networking co
que se quere amosar o alto nivel dos nosos profesionais no mundo ao
que tempo que se celebra o décimo aniversario da dita asociación.
Neste encontro atoparanse 16 profesionais galegos que
traballan no estranxeiro ocupando postos salientábeis en empresas
tecnolóxicas de referencia a nivel internacional compartirán as
súas experiencias, plans de futuro e posibilidades de colaboración
con empresas de Galicia. Cómpre subliñar que todo isto se atopará
inserido na iniciativa Talento.gal,
posta en marcha por Ineo.
Con esta reunión
preténdense crear sinerxías e tirar proveito desa rede de contactos
de alto nivel que supoñen os profesionais galegos no exterior.
Trátase, entón, de orientar ás firmas da nosa Comunidade para que
coñezan en que traballan nas súas compañías e que colaboracións
poderían propor.
En
palabras de Ineo, “este foro podería traducirse nunha porta de
entrada a investigadores que buscan empresas para pór en mercado as
súas solucións, xa que por esta vía abriríase un camiño para
chegar a firmas de terceiros países con moito máis percorrido neste
eido”.
A
asociación tamén lembra que a súa experiencia (estes dez anos de
intensa actividade defendendo as nosas empresas e favorecendo a súa
procura de novos mercados), entre outras moitas conclusións, achega
a seguinte realidade: no sector tecnolóxico o talento galego está
amplamente presente no mundo. Este é o motivo polo que nesta
primeira edición a iniciativa Talento.gal se centre no sector TIC,
aspirando a ampliarase en vindeiras citas a outros ámbitos.
Microsoft, Warner Music, Visa, Siemens, Orange, Cern,
Telefónica USA ou Vasco Data Security son algunhas das firmas que
representan os profesionais que se darán cita na xuntanza da
vindeira semana.
Talento.gal é unha
contribución de Ineo que conta co apoio do IGAPE, da Xunta de
Galicia e dos fondos europeos FEDER. Trátase dunha iniciativa de
longo alcance que busca abrirse a outros axentes, alén do
empresariado: universidades que queiran manter o contacto cos seus
alumnos, colexios profesionais que queiran identificar onde están os
seus profesionais máis recoñecidos, administracións públicas que
desexen facer seguimento a circulación do talento... Dito doutro
xeito: que se converta nun observatorio do talento galego a nivel
mundial e unha rede de intercambio de experiencias.
Amais de presentar este
programa e debater e reflexionar acerca do noso pulo creativo en
materia empresarial e innovadora, Ineo celebrará os seus dez anos de
vida ademais de presentar a súa nova xunta directiva. Terá lugar na
mesma sede de AFundación 6 de outubro, ás 19.30 horas.