Iníciase o bloqueo a The Pirate Bay dende España

O Xulgado Centro do Contencioso-Administrativo nº 5 de Madrid sorprendeu esta semana instando aos provedores de servizo de acceso á Internet a suspensión e bloqueo en España no prazo de 72 horas de The Pirate Bay, buscador de contidos distribuídos a través da rede de intercambio de ficheiros BitTorrent que retomou a súa actividade o mes pasado tras un par de meses fóra de liña. Esta decisión xudicial parece responder a unha denuncia presentada por AGEDI ante a Sección Segunda da Comisión de Propiedade Intelectual contra o buscador baixo os dominios thepiratebay.org, thepiratebay.net, thepiratebay.se e thepiratebay.com. Este procedemento teríase iniciado o pasado mes de xuño, cando se instou a The Pirate Bay a retirar contidos suxeitos a dereitos de autor, e ante o incumprimento do mandato da Sección Segunda, procedeuse agora ao bloqueo dende España a The Pirate Bay, seguindo os pasos de países como Reino Unido, Irlanda, Holanda ou Francia, que por outra banda teñen demostrado ser pouco efectivos (xa que existen numerosos xeitos de saltar os distintos bloqueos).
Pero non só sorprende que se realice un bloqueo que ten demostrado ser pouco efectivo, senón que tamén sorprende o mal momento do mesmo, xa que o servizo non conseguiu recuperar a súa relevancia tras a súa desaparición temporal, e incluso algún dos seus fundadores instou aos usuarios a tomar precaucións no acceso ao mesmo, ante a posibilidade de que puidesen ser espiados polas autoridades, recomendado recorrer a outras plataformas ou tomar medidas para protexer a identidade antes de empregar servizos deste tipo (evitando así futuras persecucións).
No momento de escribir estas liñas o único operador que tería bloqueado a The Pirate BAy en España sería Movistar, esperándose que o resto o faga en breve, aínda que cómpre destacar que a orde xudicial non indica o método a empregar para o bloqueo, o que podería facer que moitos usuarios nin sequera chegasen a percibilo por, por exemplo, empregar servidores de DNS distintos aos do seu operador, polo que haberá que agardar para saber se as medidas adoptadas teñen un impacto significativo no acceso a The Pirate Bay dende España.