LG comercializa un novo smartphone con tapa

luns, 27 de xullo do 2015 Marcus Fernández

Coa chegada dos smartphones os teléfonos móbiles en formato de cuncha parecía que pasarían á historia, pero nos mercados asiáticos levan tempo intentando casar ambos tipos de produto, principalmente para procurar un mellor achegamento aos consumidores de máis idades, que tenden a sentirse máis seguros cun terminal que pode pecharse, e así temos que en Corea do Sur presentan o LG Gentle, un smartphone con Android 5.1 con tapa e pantalla táctil de 3,2 polgadas (cunha resolución de 480 x 320 píxeles).
Falamos dun smartphone bastante básico, cun procesador de catro núcleos a 1,1 GHz, 1 GB de RAM, 4 GB de almacenamento interno ampliable mediante microSD, cámaras de 3 e 0,3 Mpíxeles e batería extraíble de 1.700 mAh, aínda que as súas limitacións como smartphone non fai que prescinda de conectividade 4G e incluso sorprenda integrando no seu teclado físico os botóns de navegación de Android.
Por fortuna, este smartphone non aproveita o seu orixinal formato para comercializarse a un prezo esaxerado, e sae á venda a 200.000 wons (uns 155 euros) aínda que a súa comercialización limitarase a poucos mercados.

O LG Gentle sae á venda en dúas cores distintas

PUBLICIDADE