Lanzada unha app para evitar que estraguemos tempo na procura de sitios turísticos: mimAPPa
martes, 22 de xullo do 2014
Calquera que camiñase
por Santiago, por calquera dos seus barrios e a calquera hora, tivo
por forza que ser obxecto algunha vez da seguinte pregunta: Por onde
fica a Catedral? Cóntanse por centos os turistas que camiñan por
Compostela adiante dando voltas na procura do dito monumento, ao
igual que tamén se contan por centos os que pretenden levar o seu
coche ao Obradoiro (se se puidera aparcar alí, a praza estaría
ateigada de automóbiles). Ben, isto vén a conto porque cada vez
queremos ser máis eficaces nas nosas visitas a outras vilas e
cidades, e é unha molestia estragar tempo, perderse e ter que
preguntar. Para isto, e para reducir ao mínimo a cantidade de xente
extraviada preguntando dende o coche onde queda este sitio ou aquel,
as emprendedoras asturianas Carmen
García e Verónica Casado desenvolveron mimAPPa,
unha aplicación para localizarmos lugares de interese de maneira
rápida.
A
principal motivación de Carmen e Verónica á hora de pór en marcha
este desenvolvemento foi a de achegar utilidade para os viaxeiros e,
ademais, ampliar as súas posibilidades reais de gozar do tempo de
lecer. Ou sexa, ceibalos da carga de ter que empregar tempo e
esforzos en atopar unha paraxe ou un monumento determinado. “En
ocasións”, sinalan, “optamos por acudir aos puntos de
información de cada localidade, nos que achegan unha infinidade de
mapas e folletos publicitarios, ou por buscar en Internet os lugares
máis característicos dunha zona entre os miles de resultados
valorados de forma subxectiva polos usuarios”. Porén, o problema
segue a ser como chegar e como localizar eses lugares de xeito doado
e rápido. “Trátase de que o turista invista todo o tempo que
perde en buscar actividades para as súas vacacións en tempo libre
de desconexión e descanso”, engaden Carmen e Verónica.
Por certo que a súa
aplicación abrangue sitios de interese dun bo número de cidades
españolas, entre as que se contan as máis visitadas (Barcelona,
Madrid, Sevilla ou Toledo) e as principais urbes de Asturias,
Galicia, Cantabria ou Euskadi. A idea é seguir avanzando para dar,
“a ritmo veloz”, cobertura a toda a xeografía estatal. A
ferramenta, din, “facilita en tan só dous pasos a información
requirida polo usuario, entre a que destacan puntos de interese como
monumentos, restaurantes, museos ou actividades de turismo activo,
ademais de distintos recursos como hoteis, taxis, gasolineiras,
centros de saúde ou aparcamentos, entre outros”.