Lugo súmase á plataforma Tropa Verde
luns, 9 de xaneiro do 2017
Tropa Verde, o servizo de raizame compostelá para
fomentar a reciclaxe de aparellos de todo tipo (eléctricos,
electrónicos, informáticos) e/ou o seu correcto tratamento, xa
é unha realidade en Lugo con espazo en liña de seu,
lugo.tropaverde.org. Así
o fixeron saber os días pasados o concelleiro de Desenvolvemento
Sustentábel, Daniel Piñeiro, a dinamizadora do servizo, Marta Morán
e máis Marta Vázquez, directora comercial da empresa Teimas,
responsábel do arrinque da iniciativa en Santiago, xunto co Concello
compostelán. Segundo informaron, o obxectivo é compartido en
ámbalas urbes galegas: téntase fomentar a reciclaxe e a
concienciación ambiental entre a cidadanía, impulsando ao mesmo
tempo o comercio local. Tamén lembraron que Tropa Verde é unha
plataforma multimedia, accesíbel en tropaverde.org,
onde podemos darnos de alto e trocar por premios os puntos que
vaiamos obtendo con cada pequeno (pero grande) labor de reciclaxe
persoal. Na vertente lucense da iniciativa colaboran o Concello,
Teimas e Urbaser.
Segundo aclararon os seus responsábeis en rolda
de prensa, a veciñanza que se rexistra no portal e realiza accións
responsábeis medioambientalmente, obtén un cheque que debe
introducir na web a fin de trocar os puntos recibidos por descontos e
premios en establecementos locais de comercio e hostalaría. Durante
a presentación, o edil fixo fincapé “no matiz de sensibilización
desta campaña” para concienciar á poboación de a importancia de
a reciclaxe, así como na recuperación e segundas vidas de
refugallos eléctricos, electrónicos e informáticos, ao mesmo tempo
que animou á cidadanía a participar e implicarse na axeitada
xestión de residuos.
En Lugo a iniciativa conta de inicio co patrocinio
de 59 establecementos que ofertan case 850 recompensas e descontos
por un valor de case 6.000 euros. Ao punto limpo, como emisor destes
cheques, súmanse ademais os centros de convivencia, que recollerán
pilas e tapóns, e o Centro de Servizos Xerais do Concello.
Lembrar que Santiago de Compostela e Lugo son as
dúas primeiras das cidades galegas en sumarse a Tropa Verde, ás que
se engadirán en datas vindeiras os concellos de Ames, Porriño,
Redondela e Sarria.