Máis de 40 profesionais do sector TIC participaron da XXII LaconNetwork

Esta tarde máis de 40 emprendedores e empresarios do sector TIC xuntáronse no Restaurante Praia de Quenxe en Corcubión para celebrar a 22ª edición da LaconNetwork, xantar empresarial que serve para estreitar as ligazóns entre as empresas do sector tecnolóxico galego, nun ambiente distendido que facilita o networking e contribúe á consolidación da identidade deste ámbito profesional na nosa comunidade.
Entre os asistentes da presente edición destacaban o enxeñeiro de telecomunicacións e escritor Xavier Alcalá, o blogastrónomo Manuel Gago, Manuel Pan (xerente de Abertal), Alejandro Lamas (director de Sixtema) e Daniel Cerqueiro, este último director de Galinus Taller de Novos Medios, empresa que se encargou da organización deste encontro, que por primeira vez repite vila.
Tras o habitual xantar, os asistentes puideron realizar unha viaxe en autobús para coñecer a beleza da Costa da Morte, acompañados polo historiador muxián Manuel Vilar. Esta actividade achegounos á Fervenza do Ézaro e ás casetas de pescadores de Caldebarcos (exemplo de recuperación mariñeira tradicional) para rematar a xornada cunha Foliada con músicos da zona.