Na Rede un servizo para emitir presupostos de avarías de coche logo de subirlle a foto do desperfecto
xoves, 19 de xullo do 2012
Dende
Girona chéganos estes días a nova da posta en marcha dunha páxina web de
interese para as condutoras e condutores e, de entre estas e estes, quen estea
pensando en amañar o seu vehículo. Estamos a falar de Taliaris, unha páxina que é algo así como a
adaptación ao universo virtual de quen che atende no taller cando non sabes se
deixalo alí ou non, e procuras deixar a porta aberta para seguir buscando
alternativas ao arranxamento, alternativas máis económicas. Ou sexa, que a web
achega presupostos de reparación e, segundo avanzan os seus creadores,
unicamente inseríndolle unha fotografía do vehículo.
Nas súas
palabras, o obxectivo da ferramenta é achegar o mellor prezo posíbel, co aforro
de tempo e diñeiro que supón a busca en liña. Taliaris.com, acabada de estrear,
conta xa co apoio de 75 talleres de 10 provincias (unha boa parte deles
emprazados en Catalunya, loxicamente, ao proceder de alí a iniciativa
empresarial), número que os seus responsábeis, loxicamente, agardan ampliar até
ofrecer un cobertura óptima de todo o territorio estatal incluíndo,
pormenorizadamente, os principais núcleos de poboación e unha boa parte das
cidades pequenas, vilas e demais. Máis polo miúdo, prevese acadar a cifra de
500 talleres a finais de 2013 e máis unha facturación de 3 millóns de euros.
Arestora, recordan, tendo en conta que en España lévanse a cabo uns 36 millóns
de arranxamentos anuais, o obxectivo de Taliaris é acadar as 180.000 xestións de reparación
antes de que remate o segundo dos exercicios.
Sobre o
procedemento axeitado para tirarlle partido a este servizos, dicir que só se
precisa subir á web unha foto do desperfecto no noso coche, amais da ficha do
vehículo en cuestión. “En menos de seis
horas”, infórmase, “a páxina envía a
petición de presuposto, sempre pechado, entre os establecementos máis próximos
concertados pola web, e que envían directamente ao usuario”. É pois unha
solución innovadora para os condutores, “que
están afeitos a mercar todo pola Rede, que son cada vez máis, aqueles que
sofren unha avaría lonxe do seu taller de sempre ou aqueles que non teñen tempo
para levar o vehículo ao establecemento de reparación e queren coñecer canto
custará a súa reparación previamente”, sinala Marçal Saurí, xerente da web.