O 63% dos establecementos en liña venden grazas a promocións e descontos
mércores, 20 de maio do 2015
Os responsábeis do motor
de busca Doofinder,
especializado en produtos e contidos para tendas en liña, veñen de
facer un estudo sobre a actividade dos comercios online e os
pros e contras da mesma: aquilo que lles axuda a medrar e aquilo que
llelo impide. A investigación abre fogo co seguinte dato: o 63%
destes establecementos venden grazas a promocións e descontos.
Ademais, o 44% afirma que o prezo é a principal preocupación dos
usuarios nas súas tendas en liña. Séguena os gastos de envío
(23,5%) e as garantías de devolución (11,9%).
A investigación, feita
sobre a base de 700 establecementos xestionados por Doofinder, sinala
que só o 1% dos compradores-internautas adquire produtos que non
pensara comprar, malia as tentativas e estratexias para incrementar
este tipo de vendas mediante sistemas de recomendación durante o
proceso do carriño da compra.
Por comunidades, Madrid,
Catalunya e Andalucía son as zonas nas que máis produtos se
adquiren por esta vía. No outro extremo sitúanse Navarra,
Estremadura e Castela A Mancha.
O estudo realizado por
Doofinder tamén pon de manifesto hábitos do consumidor online
referente ao medio de pago máis empregado como “o mellor intre
da semana para mercar”. Asi, o maior volume de compras céntrase
nos primeiros días da semana, entre o luns e o mércores con maior
nivel de compras entre as 11:00 e as 13:00 horas.
En canto ao medio de pago
preferido, este é o cartón de crédito, “pola súa rapidez e
facilidade á hora de efectuar a transacción”. Por certo que
nestas vantaxes os teléfonos móbiles tamén xogan un importante
papel, xa que polo menos o 15% do total das compras en liña
realízanse a través dos dispositivos.
Os datos sobre o perfil
medio de compradores por Internet son, segundo o estudo, moi
axustados entre homes e mulleres, o 52,2% son homes fronte o 47,8%
que son mulleres. En canto á idade, o 73,8% teñen entre 20 e 45
anos.