O CITIC estará presente no Multi-Foro Industria 4.0
luns, 2 de maio do 2016
Os días 9 e 10 de maio
vaise celebrar na nosa terra o Multi-Foro
Industria 4.0, un encontro que ten a finalidade de impulsar a
adaptación das empresas industriais ás tecnoloxías da Industria
4.0. Estas tecnoloxías, como lembraremos, son o piar e a ferramenta
dunha maneira de producir intelixente (arestora en fase de
afianzamento) que se basea nas fórmulas do colaborativo e da procura
das máximas rendibilidade e eficiencia nos procesos de produción.
A cita contará con representantes dos gobernos galego e estatal,
presentando os detalles da folla de ruta da Industria 4.0 para
ámbalas administracións. Participarán empresas como Indra,
Telefónica, Navantia ou Grupo PSA e entidades como GAIN, o CESGA,
Gradiant, AMTEGA e o Centro de Investigación TIC (CITIC).
Segundo informa o CITIC,
o centro estará presente no Multi-Foro dado que está “aliñado
coa estratexia da Xunta en materia de Industria 4.0”. Isto implica,
entre outras cousas, o apoio do CITIC a proxectos abeirados á dita
etiqueta 4.0, contribuíndo ao impulso das empresas (melloras nos
seus procesos produtivos, optimización dos seus fluxos de traballo,
pulo á competitividade, etc) mediante Investigación e
Desenvolvemento de seu. “O CITIC”, engade o centro, “como
axente de I+D que ten participado na definición da RIS3 Galicia
(Estratexia de Especialización Intelixente de Galicia) a través dos
grupos de traballo, apostou pola modernización da industria galega
como un dos seus piares de referencia”.
Volvendo ao Multi-Foro,
lembrar que se vai artellar en catro foros temáticos, a desenvolver
durante os días 9 e 10 de maio nas sedes de GAIN en Santiago e en
Ferrol (CIS Galicia). De maneira paralela, habilitarase unha sala de
exhibición onde os asistentes poderán coñecer o primeiro prototipo
galego de coche autónomo e de UAV (Vehículo Aéreo non Tripulado),
ver como funciona un robot colaborativo, presenciar un proceso de
deseño 3D e fabricación dixital, coñecer tecnoloxías de impresión
3D (bioimpresión) ou probar novos dispositivos de realidade virtual
que se lanzarán ao mercado en 2016. Por temáticas, estas serán as
principais no Multi-Foro: nanotecnoloxía, robótica, fabricación
aditiva, impresión en 3D, bioimpresión, realidade virtual,
realidade aumentada, simuladores, computación, UAV ou drons.