O CPEIG intégrase nun novo instrumento para mellorar a profesión TIC no eido local
venres, 6 de maio do 2016
O Colexio
Profesional de Enxeñaría en Informática (CPEIG) é unha das
entidades integradas no Grupo de Traballo FEGAMP-Profesionais TIC das
Entidades Locais de Galicia, iniciativa formalizada o pasado 31
de marzo co obxectivo de ser “un novo instrumento ao servizo da
profesión e impulsar melloras nas carreiras laborais dos
responsábeis tecnolóxicos no eido local”. Na xuntanza que deu
forma a constitución do Grupo de Traballo acordouse, entre outras
cousas, o desenvolvemento dunha declaración institucional no nome da
comisión para pór en valor o papel dos profesionais TIC dentro das
entidades locais. Con esta declaración darase visibilidade á
problemática actual destes profesionais. Este texto será redactado
por Fernando Suárez, presidente do CPEIG, co apoio de Juan Luís
Núñez, representante do Concello de Vilagarcía de Arousa.
Outra das temáticas avaliadas na xuntanza foi o da
formación. En base a isto, determinouse facerlle chegar á FEGAMP as
propostas formativas precisas para o persoal das entidades integradas
nesta federación, de maneira que se poidan trasladar á Escola
Galega de Administración Pública (EGAP) para valorar a súa
realización, en colaboración co CPEIG e a Axencia para a
Modernización Tecnolóxica de Galicia, a AMTEGA. Tamén se fixo un
chamamento para visualizar, por medio da FEGAMP, os cursos que se
realicen e poidan ser de interese para os devanditos profesionais.
Segundo informa o CPEIG, “os integrantes do grupo de traballo ou
calquera outra persoa do ámbito TIC das entidades locais poden
achegarlle á federación as iniciativas que consideren relevantes
para asegurar a súa difusión ao resto do grupo”.
Os asistentes á xuntanza de constitución do Grupo
de Traballo foron as seguintes persoas: Carina Anta Arias (O Barco),
Estela Barreal Díaz (AMTEGA), Irene Marín Gómez (AMTEGA), Eduardo
Otero Pardo (Viveiro), Eduardo Risco (Lugo), Miguel Anxo Gómez
(Oroso), Fernando Suárez Lorenzo (CPEIG), Jorge Villar Álvarez
(Ourense), Juan Gabriel Fernández García de la Rocha (Deputación
de Pontevedra), Juan Luis Núñez Touris (Vilagarcía de Arousa),
Miguel Orgueira Gómez (Cabanas), Teresa Calvo Pérez (Poio), Olalla
Casanova (Redondela) e Raúl Fernández Iglesias (FEGAMP).