O CPETIG organiza a vindeira semana un obradoiro sobre a Oficina de Xestión de Proxectos
venres, 2 de marzo do 2012
- Imaxe dunha das xornadas sobre informática xudicial desenvolvidas recentemente polo CPETIG
O Colexio Profesional de Enxeñaría Técnica en Informática de Galicia (CPETIG) vai organizar os vindeiros 9 e 10 de
marzo unha actividade formativa sobre as metodoloxías máis innovadoras e de
meirande proxección futura para xerar, dar acubillo e desenvolver iniciativas
no seo dunha empresa. O curso, máis polo miúdo, dirixirase a formar aos
asistentes sobre o labor dunha Oficina de Xestión de Proxectos, PMO. Unha
oficina destas características, informa o CPETIG, que celebra a actividade en
cuestión no Hostal dos Reis Católicos de Santiago, é “un departamento que define e mantén os estándares de procesos, xeralmente
relacionados coa xestión de
proxectos, dentro dunha organización ou empresa”. A PMO, deste xeito,
funcionaría como fonte de documentación, dirección e métrica neste labor
empresarial.
O seminario, engade o colexio, “está
aberto a todos aqueles profesionais que poidan verse no escenario de definir a
operativa dunha PMO, traballar nunha PMO, ou simplemente
traballar nun contorno no que o seu traballo é monitorizado por unha PMO”.
Os colexiados e precolexiados no CPETIG, así como os estudantes de
informática das Universidades de Santiago, Coruña e Vigo, obterán importantes
descontos na matrícula deste obradoiro formativo que dirixirá o experto formador
José Luis Iparraguirre, primeiro español en obter a certificación High Maturity Lead Appraiser polo
Software Engineering Institute e certificado para avaliacións dos niveis 4 e 5
de CMMI.
José Luís Iparraguirre,
engade o CPETIG, conta cunha gran experiencia impartindo cursos por todo o
mundo sobre CMMI, Ampliación da Constelación de Servizos e Ampliación da
Constelación de Adquisición. Na súa traxectoria laboral, dicir que participou
como responsable da implantación de proxectos para alcanzar os diferentes
niveis CMMI en numerosas empresas a nivel nacional e internacional como poden
ser GFT Iberia, Caixa Galicia ou Telefónica I+D. Ademais levou a cabo a
realización de diagnósticos SCAMPI clase A en máis de 50 compañías.
O curso desenvolverase no Hostal do Reis Católicos (Praza do Obradoiro 1) e
a orientación do mesmo “é eminentemente
práctica, baseándose os escenarios propostos en casos reais de PMOs nos que o
relator participou directamente, tanto na definición conceptual da súa
estrutura de traballo, como na operación das esmas”. No transcurso da
actividade formativa afondarase en cuestións como o a metodoloxía para acadar o
éxito dunha PMO ou os diferentes rumbos que o labor despregado no seu seo pode
ter.
O programa do curso abordará catro partes ben diferenciadas. Nunha primeira
etapa realizarase un rápido repaso dos obxectivos dunha PMO, para pasar despois
a falar sobre a PMO no lanzamento de proxectos e sobre a importancia do PMO no
control de proxectos. O ciclo formativo completarase cun completo repaso sobre
o papel da PMO como axente de comunicación e cun apartado dedicado á
recomendacións prácticas. O número de prazas dispoñibles é de 15, adxudicándose
por orde de inscrición, engade o colexio.