O CSIC celebra o Día da Arqueoloxía cun gran mural en liña de investigadores
xoves, 28 de xullo do 2016
O Consello Superior de
Investigacións Científicas (CSIC) celebra este 29 de xullo o Dia
da Arqueoloxía. E faino, a través do INCIPIT
(Instituto de Ciencias do Patrimonio, con sede en Santiago) e cos 13
socios do proxecto europeo NEARCH, cunha iniciativa
tecnolóxico-dixital dirixida aos profesionais adicados ao estudo das
pegadas do noso pasado. A actividade consiste en convidar a este
colectivo (traballadores, estudantes e voluntarios da arqueoloxía en
Europa) a que nos achegue (mediante textos, imaxes ou vídeos) o seu
traballo cotián na procura de elementos que reconstrúan a nosa
historia e nos axuden a coñecer mellor o presente e o futuro (a
través do pasado). O material deberá ser enviado á conta
dayofarchaeology@gmail.com para, logo, ser difundida na web
dayofarchaeology.com.
“O fin último”,
informa o INCIPIT, “é abrir unha xanela dixital desde a que
observar a vida diaria de arqueólogos e arqueólogas de todo o
mundo, amosando a gran variedade de traballo que se leva a cabo no
mundo ao abeiro desta profesión, e axudando a aumentar a conciencia
colectiva sobre a relevancia e importancia da arqueoloxía no mundo”.
Proxecto NEARCH
Financiado polo programa
Culture da Unión Europea, desenvólvese entre 2013 e 2018. O
obxectivo é fortalecer as ligazóns entre arqueoloxía e sociedade,
abrindo a disciplina á comunidade, implicando a esta na súa
práctica e trasladando esta reflexión ao ámbito da investigación
e a xestión do patrimonio arqueolóxico. Coordinado polo Institut
National de Recherches Archéologiques Préventives (INRAP, Francia),
participan 14 socios, maioritariamente institucións de
investigación, así como entidades da administración, empresas e
organismos de creación e exhibición cultural.
Mostra na Coruña
Ademais do devandito e
con motivo tamén do Día da Arqueoloxía, o MUNCYT da Coruña
inaugurou hoxe a mostra Fotciencia13. A mostra recolle as fotografías
gañadoras da décimo terceira edición do certame de fotografía
científica Fotciencia, así como unha escolma doutras 49 imaxes
presentadas ao concurso. Este certame está organizado pola FECYT e o
CSIC en colaboración coa Fundación Jesús Serra. OP vídeo coas
imaxes recoñecidas polo xurado e toda a información relativa ao
certame están dispoñíbeis en fotciencia.es.
Entre as achegas gañadoras e que se poderán ver na mostra atópase
unha fotografía que reflicte os microorganismos presentes na man
dunha nena (primeiro premio na categoría Xeral) e un cristal
de zeolita empregado para descontaminar a auga (premio premio
categoría Micro). A exposición poderá visitarse até o 4 de
setembro.