O Campus de Ourense abre unha completa web para conmemorar o Ano da Luz
martes, 20 de xaneiro do 2015
Dende o Campus de
Ourense veñen de pór en marcha unha nova web,
ail2015.laserphotonics.org,
co obxectivo de conmemorar e dar conta das actividades galegas do Ano
Internacional da Luz e das Tecnoloxías Baseadas na Luz (IYL2015),
que se celebra a nivel mundial e
que ten no dito Campus o epicentro do comité galego, coordinado
polo catedrático de Óptica da Universidade de Vigo Humberto
Michinel. O obxectivo da páxina, amais de acubillar concursos e
informar de todo o que se vaia facendo dende a nosa terra para
festexar a dita celebración, é salientar a importancia da luz e “o
seu papel fundamental na vida cotiá e no desenvolvemento da
sociedade e das novas tecnoloxías, revolucionando eidos como a
medicina ou a fabricación de produtos”.
Segundo se informa
dende o Campus a un nivel máis detalle, na páxina iranse
“publicando todas as actividades que se vaian levando a cabo baixo
o paraugas común do Ano Internacional da Luz en Galicia”,
converténdose “nun espazo en continua construción no que se
poderán atopar, ademais do calendario de eventos, información sobre
esta conmemoración, novas ou mesmo unha completa relación das
entidades colaboradoras”.
Entre as actividades
máis salientábeis atopamos tres concursos convocados ao abeiro da
seguinte temática común: a luz como elemento de conexión. Estes
certames están abertos a toda a poboación e son Que é a luz
para ti? (que pretende animar á sociedade a expresar en galego o
que lle inspira a luz en dúas categorías, microrrelatos e poesía),
As mil e unha luces (que se dirixe a pór de manifesto a
relación entre luz e imaxe a través da súa manifestación gráfica
en diferentes soportes) e Coas mans na luz (que acubillará
experimentos caseiros ou divulgativos, individuais ou en grupo, que
deben ser recollidos en vídeo para despois ser valorados). As bases
e prazos atópanse na propia web do Ano Internacional da Luz de
Galicia.
Os premios variarán en
función da categoría de idade: 300 euros para os maiores de 18
anos, un telescopio astronómico newtoniano para os de entre 13 e 18
e un telescopio para os menores de 13 anos. Todos serán agasallados
ademais cun diploma acreditativo.