O Centro Demostrador TIC Virtual achega ao terceiro sector dúas novas solucións abertas
xoves, 19 de novembro do 2015
A
Axencia para a Modernización tecnolóxica
de Galicia (AMTEGA)
vén de fornecer ás empresas e
entidades do terceiro sector (organizacións e entidades sen
arela de lucro con firme alicerce solidario e social) dúas novas
ferramentas abertas (open source) no Centro Demostrador TIC
Virtual. Unha destas
aplicacións é o xestor
de recursos empresarial (ERP) Odoo,
orientado á xestión dos procesos internos dunha empresa (tarefas
como facturación,contabilidade,
almacén ou proceso de produción). Tamén está dispoñíbel
o xestor de relacións cos clientes
CiviCRM, en
palabras de AMTEGA “un recurso orientado
a mellorar a comunicación coa masa social e á realización de
campañas de captación de fondos en entidades do terceiro sector”.
Segundo
engade a Axencia, a
través da páxina web do CDTIC pódese
solicitar xa un período de proba de calquera destas dúas solucións
de software libre.
Odoo,
máis en detalle, é un sistema de
xestión empresarial libre que salienta,
segundo informa AMTEGA, “por ser moi
sinxelo pero tamén moi potente e cunha
ampla marxe de adaptación ás necesidades de cada quen,
grazas á grande cantidade de módulos dispoñíbeis”.
O CDTIC Virtual ofrece dúas configuracións diferentes de proba de
Odoo; unha delas orientada a empresas de
produción, pensada para para a xestión
dos procesos de fabricación; e por outra banda, unha solución
orientada a empresas de compravenda que
inclúe módulos de TPV e comercio
electrónico.
Polo que atinxe a CiviCRM,
trátase dun
software de xestión de relacións cos clientes orientado ao seu uso
por parte de organizacións que traballan no eido social. Está
dispoñíbel
en máis de 20 idiomas e fornece unha
manchea de funcionalidades,
o que tamén achega unha ampla marxe de adaptación aos intereses de
cada usuario. “O principal atractivo
de CiviCRM”, explica AMTEGA,
“é que está pensado especificamente para organizacións do
terceiro sector (asociacións, fundacións, ONGD, etc)”. A xestión
de contactos, socios e doazóns de forma integral achega
oportunidades de melloras para as organizacións.