O Concello de Ames e a Xunta visitan as dependencias de Ozono
martes, 10 de xullo do 2018
O
Goberno local de Ames segue adiante cos seus itinerarios polo tecido
produtivo do concello. Se
hai uns días falamos da visita ás dependencias da tecnolóxica
Tecalis, este 10 de xullo foi
a quenda doutra empresa innovadora do sector: Ozono, situada no
Polígono de Novo Milladoiro. Na visita á sede de Ozono
Multimedia, especializada en desenvolvemento de software, SAT e
consultoría, participaron o alcalde de Ames, José Miñoñes, a
concelleira de Promoción Económica, Isabel González, e máis o
delegado territorial da Xunta na Coruña, Ovidio Rodeiro.
Ozono,
para quen non o saiba, é unha sociedade laboral TIC que dende 2002
deseña e habilita páxinas web, aplicacións móbiles, sitios de
comercio electrónico e software especializado. O seu eido é o
software opensource desde a base ou en código fonte xa
desenvolvido. Está integrada por sete socios e centra boa parte dos
seus esforzos na creación de produtos verticais de xestión
empresarial e servizos SaaS (Software as a Service). Segundo
puideron comprobar os participantes na visita, un dos puntos máis
salientábeis deste proxecto empresarial é a oferta de servizos
expertos de alto valor engadido e a súa destacada calidade
Na
cita de hoxe lembrouse que a entidade foi beneficiada cunha das
axudas da Consellería de Economía, Emprego e Industria do Programa
Aprol, que teñen como obxecto “fomentar a incorporación de
persoas desempregadas e persoas traballadoras temporais a
cooperativas e sociedades laborais e apoiar o desenvolvemento de
proxectos de emprendemento colectivo en empresas de economía
social”. Así, dende a Xunta de Galicia apoiouse a esta empresa
para a incorporación de dous novos socios.