O Concello de Boqueixón ábrese á interacción cos seus veciños a través do móbil
venres, 18 de xullo do 2014
- Na presentación de City4boqueixon estiveron presentes o alcalde de Boqueixón, Jesús Sanjuás Mera, e o responsable de Implantación de eLABORO, Pablo Garrido
Os desenvolvemento de eLABORO continúan a facilitar o
achegamento dos cidadáns aos seus concellos a través do móbil, e hoxe mesmo
presentouse en sociedade a ferramenta City4boqueixon,
que facilita que os veciños de Boqueixón poidan instalar nos seus móbiles con
Android unha aplicación que permite comunicar incidencias á Administración
local, o que facilita a súa solución e permite tamén facer un seguimento por
parte dos responsables locais e dos cidadáns preocupados.
Unha vez descargada a aplicación, un usuario só ten que indicar o tipo de
incidencia (segundo afecte aos servizos e espazos municipais, como auga, rede
de sumidoiros, mobiliario urbano ou espazos verdes) e a súa localización, para
que a información sexa derivada ás persoas responsables de resolver o problema,
recibindo o usuario unha mensaxe confirmando tanto a notificación da incidencia
como a súa solución (cando se execute).
City4boqueixon tamén permitirá recibir avisos urxentes do Concello, nos que a
inmediatez é crucial, como casos de persoas perdidas, temporais,
desprendementos en estradas, cortes de auga e outros. O sistema de avisos á
poboación é unha mellora da aplicación que desenvolverase ao longo do ano para
potenciar a interacción cos veciños.
A nova ferramenta móbil tamén permite consultar as novas relacionadas coa
actividade municipal, de xeito que pode empregarse para saber de cursos,
actividades municipais, ofertas de emprego ou viaxes organizadas.