O Goberno galego renova o seu compromiso a prol da banda larga
mércores, 21 de xaneiro do 2015
O presidente da Xunta, Alberto Núñez Feijoo, que presidiu
este mediodía o acto de presentación do Plan
de Banda Larga de Galicia: presente e futuro, salientou que este plan
logrou que o acceso á Internet sexa universal na Comunidade rematando en catro
anos coa fenda dixital entre a fachada atlántica e o interior de Galicia, e
avanzou o compromiso de incrementar a velocidade con 30 Mbps para toda a Comunidade
e 200 Mbps para as cidades.
“O obxectivo é que toda a poboación teña en 2020 unha cobertura dunha calidade
de 30 Mbps de velocidade e que as cidades pasen de 100 Mbps e 200 Mbps. Este é
o noso horizonte, que é o horizonte óptimo que marca a Unión Europea para os
países da Unión en 2020”, dixo, ao que engadiu que, para acadar esta meta, se
investirán máis de 100 millóns de euros, que veñen sumarse aos 230 millóns que
desde 2010 se levan investidos. Tamén resaltou que existe un compromiso de
investimento dos operadores móbiles en núcleos de menos de 5.000 habitantes,
derivado do proceso de reparto do dividendo dixital.
A nivel municipal subliñou que, mentres en 2010 só dous
concellos de toda a Comunidade podían garantir que a súa cobertura de internet
acadase ao 90% da poboación, hoxe son 309; “é dicir, multiplicamos por 154 e os
cinco concellos restantes teñen unha cobertura entre o 70% e o 90%”. Diante
destas cifras, Feijóo salientou que hoxe os fogares galegos poden dispoñer
dunha conexión á Internet digna, “reducimos as desigualdades que tiñamos hai
catro anos e as tecnoloxías son un dos motores económicos que nos situarán no
proceso de consolidación da recuperación da nosa economía”.
O responsable do Goberno galego referiuse así a R como un
dos exemplos máis destacados de empresa de novas tecnoloxías con alma galega, e
que entre 2014 e 2015 investirá 95 millóns de euros en mellorar o seu servizo e
ampliar as velocidades de acceso. E precisou que Telefónica dedicou, en 2014,
50 millóns a levar a fibra óptica aos fogares galegos e outros 14 en estender
na comunidade a tecnoloxía 4G, mentres que Vodafone comprometeu 70 millóns de
euros en desenvolver tamén as súas redes 4G e en ampliar a cobertura 3G nas
poboacións de menos de 1.000 habitantes.
Feijoo fixo fincapé en que unha internet para todos, sen
distinción de lugar de residencia é o compromiso firme da Xunta “e que hoxe
podemos dicir que temos acadado”. E concluíu, incidindo no obxectivo de
incrementar a velocidade e a calidade, pasando de 2 Mbps a 30 Mbps e de 100 Mbps
a 200 Mbps nas cidades, “porque Galicia -dixo- ten que estar plenamente
integrada na economía global e non hai economía global sen a dixitalización das
nosas empresas e fogares”.
- Evolución da cobertura poboación desde 2009