O IES de Melide achégase ao e-learning

venres, 28 de xaneiro do 2011 Raquel Noya

No marco do proxecto Webs Dinámicas que a Consellería de Educación puxo a andar hai uns anos para, entre outras cousas, favorecer a comunicación e a colaboración online entre membros da comunidade educativa e fomentar o emprego das TIC nas aulas galegas, a Asociación Melisa vai impartir en Melide un obradoiro de achegamento a Moodle, unha ferramenta en código aberto especialmente deseñada para facilitar o labor de ensino dos mestres e mestras nunhas aulas cada vez máis dixitalizadas. Trátase dunha actividade formativa de 6 horas dirixida a formar aos profesores e profesoras do Instituto de Ensino Secundario da vila coruñesa no manexo da ferramenta Moodle, moi útil para xestionar a programación das materias que imparten e para preparar os contidos das mesma de maneira totalmente virtual. O programa deste obradoiro, que terá lugar os días 31 de xaneiro e 7 e 14 de febreiro, inclúe unha presentación de Moodle, así como actividades prácticas en torno ao funcionamento da ferramenta e material sobre chats, foros ou wikis, aplicacións de grande utilidade que proporciona a propia plataforma. Asemade, achégase información de ferramentas útiles que Moodle lle proporciona aos profesores para o seguimento dos cursos, tales como informes, rexistros e cualificacións. O obxectivo do curso, que impartirá persoalmente o presidente de Melisa, Rafael Rodríguez Gaioso, “é familiarizar aos profesionais da educación no uso dunha das ferramentas máis populares, e con máis seguidores no campo do e-learning”. O material empregado para este obradoiro estará dispoñible na web de Melisa baixo unha licenza Creative Commons, para poder ser empregado por calquera persoa interesada.

PUBLICIDADE