O Portal de Transparencia superou as 30.000 visitas e as 200.000 páxinas vistas
luns, 29 de agosto do 2016
O Goberno galego vén
de facer reconto da actividade xerada até hoxe polo Portal
de Transparencia de Galicia, unha iniciativa en liña posta en
marcha este inverno (coincidindo coa entrada en vigor da Lei de
Transparencia e Bo Goberno) co obxectivo de converterse
nun “punto único, directo e centralizado” de toda a información
que deba facerse pública á cidadanía. Segundo informa a Xunta,
o portal xa recibiu máis de trinta mil visitas desde a súa
activación.
A Dirección Xeral de
Avaliación e Reforma Administrativa, en colaboración coa Axencia
para a Modernización Tecnolóxica de Galicia (AMTEGA), foi a
encargada do desenvolvemento do portal, que botou a camiñar o pasado
7 de marzo. O obxecto da plataforma,
como puidemos saber daquela, é dar cumprimento, entre outras, ás
obrigas de publicidade activa previstas na normativa en materia de
transparencia.
Nos catro meses que
leva activo o portal houbo 32.248 visitantes distintos que
consultaron 219.169 páxinas. Segundo informa a Xunta, “as páxinas
máis visitadas están relacionadas coa normativa en tramitación,
que recibiu 15.174 visitas, os membros do Goberno e altos cargos, con
14.840 visitas, e a información sobre contratación pública, con
5.665 visitas”.
Ademais, recibíronse
115 solicitudes de acceso a información pública, entre as que a
devandita Dirección Xeral e AMTEGA salientan as relativas a persoal
(24), subvencións (14), información institucional, organizativa e
de planificación (14) ou de relevancia xurídica (7), entre outros
asuntos.
Das 115 solicitudes, 38
foron presentadas a través de medios electrónicos e 77 en papel.
Por departamentos, o maior número de solicitudes recibiunas a
Consellería do Mar, cun 21 por cento, seguida da Vicepresidencia, co
19 por cento, e a Consellería de Cultura, Educación e Ordenación
Universitaria, co 15 por cento das consultas.
Respecto das peticións
atendidas e resoltas, os devanditos departamentos informan que das
solicitudes recibidas nestes meses, “83 xa foron resoltas e o resto
están en prazo legal para a súa contestación”. Das resoltas, 12
non foron admitidas, “ben por ser precisa unha acción previa de
reelaboración, por referirse a información de carácter auxiliar ou
de apoio, ou ben por dirixirse ao órgano equivocado”.