O Programa de Voluntariado Dixital avaliouse como boa práctica de inclusión social a través das TIC
martes, 25 de marzo do 2014
O Programa de Voluntariado Dixital foi elixido pola Comisión
Europea como exemplo de boa práctica en materia de inclusión social a través
das TIC e analizouse
nun seminario de avaliación por pares celebrado hoxe en Compostela, encontro
no que participaron representantes de 10 entidades correspondentes a 7 países
europeos (Bélxica, República Checa, Polonia, Romanía, Suecia, Reino Unido e
Portugal), así como unha representante da Dirección Xeral de Emprego, Asuntos
Sociais e Inclusión da Comisión Europea, Emanuela Tassa; participando tamén na
súa clausura o director xeral de Xuventude e Voluntariado, Ovidio Rodeiro, e a
directora da AMTEGA, Mar Pereira.
A directora da AMTEGA sinalou que o Programa de Voluntariado Dixital forma
parte da Axenda
Dixital 2014.gal, que arrincaba en 2010 cunha liña específica para acadar
unha cidadanía dixital, capacitada para afrontar os retos da sociedade da
información. Neste sentido, Pereira recordou que ao Voluntariado Dixital se
suman outras medidas como a posta en marcha en 2011 da rede de aulas públicas
CeMIT con formación dixital gratuíta, presente xa en todas as comarcas galegas
con 98 centros e con máis de 32.000 usuarios rexistrados, e o Plan Abalar, no
ámbito educativo, que está a transformar as aulas tradicionais en dixitais e do
que xa se benefician 531 centros e 50.000 alumnos neste curso.
Pereira tamén destacou o esforzo na extensión de infraestruturas de
telecomunicacións na Comunidade a través do Plan de Banda Larga da Xunta, que
facilitou o acceso a Internet a máis 700.000 galegos sen cobertura en 2010.
Estas medidas, sinalou, permitiron avanzar, pero para cumprir os obxectivos da
Axenda Dixital Europa “debemos continuar traballando” e, nesta liña, indicou
que se está a elaborar o Plan de Inclusión Dixital de Galicia, que se
presentará antes do verán e que ten como obxectivo implantar un modelo global e
universal de inclusión dixital na Comunidade.
Durante a primeira xornada do seminario presentáronse cinco experiencias do
Programa de Voluntariado Dixital en colaboración con distintas entidades: a
iniciativa de Tecnoloxía e Software Libre en Centros Penais Galegos,
desenvolvida pola Asociación de Usuarios de Software Libre, MELISA; o Proxecto
Centro de recursos para persoas con gran discapacidade física, realizada por
COGAMI; o Proxecto Envellecemento Activo da Asociación Sociocultural Os Tilos;
o Proxecto Educa R, do operadora R Cable e telecomunicacións; e a Plataforma de
Crowdfunding Agora máis que nunca de
Cruz Vermella.