O camiño ao éxito de Pepephone centrou a primeira edición de The Net Room
venres, 7 de febreiro do 2014
- Os asistentes ao evento puideron coñecer un bo exemplo de marketing low cost a través dun relatorio do director xeral de Pepephone
Esta tarde o compostelán Hotel
Moure acolleu a primeira edición de The Net
Room, un orixinal evento organizado por María Mosquera e Laura Camino que busca xuntar
nunha habitación de hotel a un grupo limitado de profesionais para poder
atender a actividades de formación nun ambiente moi informal, no que
prescíndese de cadeiras, empregando coxíns como asento, que veñen a ser os billetes
para poder asistir a estes dinámicos relatorios que comezaron cunha figura
estelar, Pedro Serrahima, director
xeral de Pepephone, quen compartiu a súa experiencia no operador móbil virtual
como un exemplo de marketing low cost,
que era a temática deste encontro que completouse cunha charlar sobre
ferramentas de baixo custo, unha sesión de asesoramento exprés e varias
actividades de lecer para favorecer o networking
entre os participantes do que promete ser a primeira de moitas entregas.
Durante o seu relatorio, Pedro Serrahima recoñeceu con humildade non ser quen
de dar as fórmulas do éxito do seu operador móbil virtual, por non ter seguido
un camiño ordinario dentro do mundo da empresa, senón que simplemente
limitáronse a fixar unha filosofía corporativa consistente en facer “cousas
normais” como cobrar unicamente polos servizos prestados aos seus clientes e
non disfrazar as súas políticas de prezos.
- Pedro Serrahima explicou a súa experiencia en Pepephone como o éxito de facer "cousas normais"
Quixo destacar que o marketing low cost
no seu caso foi unha necesidade nacida da falta de recursos económicos, incidindo
no feito de que “o low cost non é o cutre”, senón que no seu caso limitáronse a
descompoñer custos e eliminar o accesorio para poder ofrecer uns prezos moi
atractivos, en vez de facer o mesmo que os seus grandes competidores, como
financiar terminais móbiles vendendo a operación como un agasallo.
Serrahima comentou numerosas prácticas de Pepephone, como os reintegros aos
clientes nos casos de incidencias, ou a adecuación das demandas dos usuarios
para crear diferentes tarifas, buscando sempre ofrecer un bo servizo de
atención ao cliente dende España xa que “a mellor oportunidade de marketing é cando un cliente ten un
problema contigo”. Esta estratexia parece ter funcionado, xa que o operador, en
vez de medrar en usuarios a base de campañas publicitarias, a principal canle
de captación de novos clientes e a prescrición dos clientes actuais, contentos
co trato recibido. Recoñece que as redes sociais son a ferramenta de marketing máis potente que existe, especialmente
para as compañías pequenas, que así poden ter certa repercusión sen ter que
recorrer ás grandes campañas que poden facer outras compañías, o que parece ter
funcionado con Pepephone, que en 2013 conseguir ser o cuarto operador que máis
medrou, pese a ser dos máis cativos.
Aínda que a sorte foi un factor fundamental no éxito de Pepephone, Serrahima
apuntou numerosos detalles chave para tal fortuna, como a sinceridade e a
transparencia (que tradúcense en clientes satisfeitos que non se senten
estafados en ningún momento) e incluso comentou que dentro da empresa poden
permitirse unha grande flexibilidade para adaptarse ás demandas dos clientes
grazas a que fan uso de software libre nos seus sistemas informáticos.
Rematada unha moi dinámica e interactiva charla de Pedro Serrahima, chegou a
quenda da co organizadora do evento, María
Mosquera, que quixo achegar ferramentas de balde ou de prezo reducido para
potenciar os negocios a través da Internet, como son solucións para realizar
composicións gráficas, plataformas de e-mail marketing, aplicacións para
analizar a nosa posición na web e nas redes sociais ou plataformas para
facilitar a xestión da nosa presenza en redes sociais. Completouse así un
evento de grande interese para os que están a emprender con poucos recursos,
que a través dun caso de éxito e unha recompilación de ferramentas poden tomar
ideas que aplicar aos seu negocio, para aproveitar o potencial das redes
sociais como catalizador.
- Os asistentes a The Net Room empregaron coxíns como asentos, dando un toque orixinal ao encontro