O comercio electrónico medra un 22,5% fronte ao 20,1% da UE
xoves, 4 de febreiro do 2016
O Observatorio
eCommerce e transformación Dixital vén de achegar os seus máis
recentes resultados (Libro Branco) sobre a situación de España en
materia de comercio electrónico. Segundo se destaca no seu
informe, España está entre os países de Europa que meirande medre
experimentaron no devandito eido TIC, cun índice do 22,5% fronte ao
20,1% (media europea). Na investigación dáselles azos, ademais, aos
especialistas que agoiran un futuro aínda máis positivo: estímase
que o crecemento proseguirá nos vindeiros anos.
Esta suba nos índices
ten varias explicacións, sendo unha das máis importantes o feito de
que España partise de porcentaxes particularmente baixas (polo tanto
sería de obriga medrar). Por outra banda, no Libro Branco apúntase
a melloras no acceso a Internet e a un incremento da confianza no que
atinxe ás plataformas e recursos de comercio electrónico.
Porén, na investigación
achégase un punto de visión crítica e recoñécese que, malia
estar por riba da media europea, a España aínda lle resta moito
camiño para estar ao nivel dos países máis desenvolvidos na
actividade comercial en liña, por exemplo Alemaña ou Dinamarca,
onde o 77% da poboación merca xa por Internet (fronte a un de cada
tres españois: o 32%).
Ao longo do Libro Branco
sinálanse varias técnicas de mercadotecnia a ter en conta. En
primeiro lugar, as redes sociais e o correo electrónico de
mercadotecnia sitúanse como “importantes técnicas de captación
de clientes”. Pero, tamén se sinala a importancia do landing
page (páxina de aterraxe para os internautas e posíbeis
clientes) nas campañas de captación de compradores, deseñada e
optimizada para conseguir a conversión. “Estas páxinas”, dise,
“deben incluír unha chamada á acción, clara e concisa, situada
nun lugar estratéxico da páxina web, utilizando cores diferentes
que resalten das cores corporativas”. Ademais, engádese, “débese
incluír unha enquisa, sen demasiados campos xa que iso sería
contraproducente, para coñecer máis acerca dos clientes e poder
ofrecerlles produtos e descontos personalizados”.