O concelleiro de Economía e Industria pon como exemplo de emprendemento á compañía pontevedresa Qubitia
martes, 18 de novembro do 2014
Qubitia,
a firma galega que
gañou a edición galega do premio aos novos emprendedores de La Caixa en 2013
e que hai un ano deu conta da
súa experiencia na busca de fortuna en Silicon Valley durante o Foro Unirede
celebrado en Pontevedra, recibiu hoxe a visita nas súas oficinas do
conselleiro de Economía e Industria, Francisco Conde, quen destacou o rol desta
empresa como “exemplo de emprendemento no eido tecnolóxico” que atrae investimento
de todo o mundo.
Conde estivo acompañado polo delegado da Xunta en Pontevedra, José Manuel Cores
Tourís, e polo director de XesGalicia, Juan Cividanes, e quixo destacar a
traxectoria de Qubitia, compañía que en só 3 anos xa se converteu en todo un referente
do sector TIC galego.
Qubitia ten un cadro de persoal no que 20 traballadores mozos e moi
cualificados conseguiron desenvolver servizos de calidade, conseguindo co seu
software “democratizar os mercados financeiros”, facéndoos accesibles ao
investidores institucionais e particulares, facilitando actuacións áxiles e
permitindo así maximizar os beneficios.
A vocación internacional desta compañía concrétase nunha “dobre vía: mediante
un produto que se está intentando implementar nos mercados internacionais”, con
clientes en Londres e Estados Unidos, “e a partir da aposta que investidores
internacionais están a facer pola empresa Qubitia”, como o xigante do
investimento FX Street. Un apoio financeiro que se sumou ao de institucións
como a propia Xunta, que a través de XesGalicia contribuíu ao desenvolvemento
do proxecto desde a súa creación.