O director de Google España equipara en Santiago a revolución dixital cos grandes acontecementos da humanidade

martes, 15 de marzo do 2011 Fernando Sarasketa

Case con toda probabilidade haxa neste intre, mentres se le este texto, un bo número de profesionais das redes tentando solucionar un reto de mercado coa seguinte pregunta: “Como o faría Google?”. Así o entende a Asociación para o Progreso da Dirección, división Noroeste, que organizou este martes 15 en Santiago un encontro TIC dirixido a favorecer o intercambio de experiencias arredor desta cousa común que son os negocios en liña, nos que Google se segue a mover con soltura. Pois ben, co fin de atinar o máximo posible coas demandas de información dos nosos profesionais, APD Noroeste convidou ao Hostal dos Reis Católicos a Javier Rodríguez Zapatero, director xeral de Google España, quen resumiu en tres claves a súa mensaxe aos empresarios galegos. Contra todo prognóstico, Rodríguez Zapatero abriu a súa breve intervención situando a Compostela como un exemplo de innovación. Por que? Pois porque tantos séculos de historia detrás só se conseguen, aínda que sexa un paradoxo, a través da innovación.
O director xeral de Google, que ten unha longa experiencia nos negocios ligados ás novas tecnoloxías (desempeñou cargos executivos en Yahoo!, Jonhson Wax e Procter & Gamble), aproveitou a ocasión, e o título mesmo da súa intervención, para non recomendarlle a ninguén que tratase de seguir ao pé da letra o camiño de Google, entre outras cousas porque o buscador “fai as cousas á súa maneira”. Polo que respecta aos tres puntos clave que artellaron a súa intervención, dicir que o primeiro foi a revolución dixital e o seu papel na historia do mundo. Certamente, dixo, é un acontecemento só comparable á Revolución Francesa ou ben á Revolución Industrial, coa diferenza de que na que estamos a vivir os cambios se notan menos, pero son igual de drásticos. Isto percíbese na fonda transformación que están a sufrir o poder económico e o político, ámbolos dous cambiando de mans, o primeiro con novos actores entrando en xogo e novos xeitos de actuar (o caso de Facebook, por exemplo) e o segundo con millóns de persoas en todo o mundo uníndose para variar o rumbo político dos seus países, sendo o caso de Tunisia, Exipto ou Libia algúns dos máis salientables. “A Rede”, dixo, “axúdanos a estar mellor informados e a ser máis competitivos, ao que cómpre engadir as posibilidades que nos abre para facer negocio”.
Polo que respecta á segunda idea, Rodríguez Zapatero abriulle unha xanela ao futuro. Ao seu xuízo, o mundo que hoxe coñecemos non ten nada que ver co que veremos dentro de tres anos. As transformacións sucédense a ritmo de vertixe, e cómpre facer un esforzo de adaptación. Nunha situación coma esta, e de non afacernos ao proceso, a sensación que teremos de incomodidade ante o mundo que se renova será cada vez maior. Na súa opinión, cómpre acostumarse a estar “cómodos nun disconfort continuo”. De nada serve pensar polos demais ou crer saber o que pensan. A este respecto, considerar que as redes sociais non teñen nada que facer a prol dos negocios non é en ningún caso un bo punto de partida.
Para rematar e como terceiro punto clave a desenvolver, Rodríguez Zapatero fixo fincapé no gran potencial das redes como fonte de negocio. “É un mundo fantástico onde a oferta e a demanda están só a un clic de distancia, con 4.000 millóns de persoas como potenciais consumidores”. Na súa opinión, Internet dálle enerxía aos negocios ao tempo que os transforma, en boa medida porque é un mercado de nichos onde a xente procura todo o quere. “Somos moitas persoas á busca de moitas cousas miúdas”, subliñou, “o planeta vai cambiando e a revolución dixital ten as mesmas consecuencias cás revolucións previas”. Na súa opinión, o 85% do que facemos arestora farémolo complemente distinto nun breve prazo de tempo.

PUBLICIDADE