O eido dos videoxogos faise forte na adversidade

Se hai algún sector que fique chantado no medio da crise xeralizada coma un penedo no temporal é o sector dos videoxogos. Case se podería dicir que nin se despeitea, do ben asentada que está a súa posibilidade de medre. Causas disto hai moitas, pero se cadra todo ten que ver co feito de que moito do que xa ofrecen as novas tecnoloxías e o lecer dixital en xeral son unha boa alternativa ao gasto en combustible para o transporte. Isto acontece no eido do traballo (onde se dán cada vez máis casos de labores a distancia, vía a Rede) e tamén no do lecer mesmo (as consolas contribúen á evasión e tamén á caída no número de desprazamentos por motivos extralaborais). Leas aparte, semella que hai datos concretos sobre o tema. Segundo apunta a Asociación Española de Distribuidores e Editories de Software de Entretemento (Adese), o eido dos videoxogos seguirá a medrar en 2009 cun incremento nas vendas do 15% na primeira metade do ano.
Estes datos, que segundo apunta Elpais.com non son definitivos, foron dados a coñecer na presentación do anuario de 2007 feito por Adese, traballo especialmente positivo e prometedor para a industria tendo en conta o que desvela: o negocio movido polo sector foi de 1.450 millóns de euros, o que significa un medre do 50% en comparación co ano anterior.
Asemade, entre os prognósticos da organización atópase un dato salientable abondo para as empresas que operan en España ou estean a piques de facelo: o crecemento no estado vai ser meirande ca no resto dos países (de feito, España é o cuarto mercado da UE no que se refire a consumo deste tipo de produtos). Neste estado de cousas, non é de estrañar (como sinala Adese) que a riqueza xerada polos videoxogos sexa xa superior á da música ou á dos DVDs.