O emprego en contidos e cultura descendeu en 2015
mércores, 4 de maio do 2016
O Observatorio da Cultura Galega do CCG vén de presentar un novo
documento de traballo sobre o estado de saúde da contorna laboral
ligada á nosa cultura. No informe O
emprego cultural de Galicia lémbrase, para comezar, que no
último ano rexistráronse en Galicia 27.800 empregados no ámbito
cultural, 800 menos que en 2014. Malia o negativo da cifra, o
devandito ámbito profesional ligado ás múltiples expresións do
pulo creativo (audiovisual, contidos dixitais, edición) ten mellores
índices que o conxunto total de emprego na nosa terra. Ademais,
dise no estudo, o
emprego cultural medra de maneira ininterrompida desde o último
trimestre de 2012 e faino a mellor ritmo que o conxunto da economía
galega agás no último trimestre de 2015, que rexistra unha lixeira
baixada. En relación con 2014, Galicia continúa por debaixo da
media estatal, que se mantén no 2,9% e baixa dúas décimas.
A investigación recorda que en Galicia
hai 11.256 afiliados destes ámbitos á Seguridade Social, o que
supón un 1,2% do total en todos os sectores, que suma 937.414
afiliacións. A maior parte destas afiliacións correspóndense coa
epígrafe de artes gráficas e reprodución de soportes gravados (un
27,2%) e coa de edición (21,4%). Séguenlles as actividades de
creación, artísticas e de espectáculos, cun 18,2%, que ademais
rexistran a maior suba, con 163 novas altas con respecto a 2014.
Perde afiliacións a epígrafe que contabiliza os empregados de
servizos de información, que pasa de 761 a 674. Os subsectores
abranguidos son artes gráficas e reprodución de soportes gravados;
edición; actividades de cinema e vídeo, TV e edición musical;
actividades de programación e emisión de radio e TV; servizos de
información; creacións artísticas; e bibliotecas, arquivos e
museos.
Por provincias, A Coruña continúa a ser
a que concentra un maior número de afiliacións, o 59,4% dos
empregado culturais, seguida de Pontevedra, cun 26,8%. Ourense é a
provincia cun menor número de empregados de ámbito cultural, con
691 afiliacións.
Polo que atinxe ao paro, este baixou en
2015 nas principais actividades culturais en 552 persoas, co que se
situou en 6.763 parados. Por profesións, os empregos relacionados
coa “Información e comunicación” continúan a rexistrar as
maiores baixadas, con 522 desempregados menos, mentres que na
epígrafe das actividades artísticas, recreativas e entretemento se
rexistran 30 desempregados menos. O informe tamén sinala que “o
desemprego é maior nos homes (51,9%) que nas mulleres (48,1%) e, por
idade, a franxa comprendida entre 25 e 49 anos continúa a rexistrar
as maiores cotas de paro”.