A nova edición do posgrao XEMTE afianzará pontes de coñecemento coas nosas empresas
luns, 7 de setembro do 2015
O 15 de outubro comeza a segunda edición do Título
Propio da Universidade da Coruña, XEMTE
(Posgrao de Especialización en Xestión Empresarial e Tecnoloxía”,
en palabras da institución académica galega “un punto de encontro
entre universidade, empresas e novos talentos baixo un modelo
diferente”. Este modelo alternativo baséase en atender e reflectir
a realidade empresarial da nosa contorna e tender pontes firmes con
ela, pontes por onde flúa o talento e o coñecemento TIC dos nosos
novos profesionais.
Segundo informa a Universidade, durante un período
de 8 meses unha vintena de docentes (“profesionais de recoñecida
traxectoria no mundo da empresa e expertos profesores
universitarios)” envorcarán toda a súa experiencia na formación
de 20 alumnos, baixo un formato docente innovador que mestura clases
tradicionais con visitas a empresas, mesas redondas ou resolución de
casos reais de xestión e de actividade no mercado.
A idea dos responsábeis do posgrao é fornecer
vantaxes para todos os implicados: para os estudantes porque se lles
achega valor engadido á súa experiencia universitaria (bagaxe para
a súa vindeira carreira profesional) e para as empresas da nosa
contorna porque se lles fornece de futuros integrantes dos seus
equipos, mozas e mozos “cunha sólida formación académica e que
con recursos para saberen aplicala de maneira eficiente na realidade
empresarial na que se insiran”. Por certo que a edición deste ano
de XEMTE contará coa participación de algunhas firmas galegas e
estatais de primeira nivel, boa parte delas ligadas ao ámbito das
novas tecnoloxías da información e as telecomunicacións, como
Altia, Telefónica, Emetel ou Abanca, entre outras.
Como dixemos, o programa académico combinará
sesións presenciais na aula con contidos e exercicios na plataforma
en liña, traballos individuais e en equipo, tutorías
personalizadas, e sobre todo, unha ampla axenda de actividades e
eventos que, a través de foros, xornadas, mesas redondas e visitas
ás distintas empresas colaboradoras, mergullarán a todos os
participantes “nunha vivencia formativa realmente enriquecedora”,
explican os organizadores.