O portal TripAdvisor concede o primeiro e o segundo premio dos mellores paradores a dous establecementos galegos
mércores, 9 de outubro do 2013
Este
martes o portal TripAdvisor entregou
en Compostela os
seus premios Traveller’s
Choice Paradores,
que outorga a dita axencia en liña segundo unha listaxe baseada nas
opinións dos seus usuarios (á par que viaxeiros). A entrega de
recoñecementos desenvolveuse
no Hostal dos Reis Católicos, que
foi un dos establecementos distinguidos polo portal, máis polo miúdo
co primeiro premio da clasificación, que recolleu o seu director,
Xulio Castro. No
acto tamén
estiveron a
directora de Turismo, Nava Castro,
a presidenta de Paradores de Turismo, Ángeles Alarcó; a directora
de relacións cos medios
de Tripadvisor, Blanca Zayas; o alcalde de Santiago de Compostela,
Ángel Currás así como a delegada territorial da Xunta de Galicia
na Coruña, Belén Do Campo.
Os
galardóns, concedidos a dez paradores,
sitúan no primeiro e segundo posto, respectivamente, ao Hostal dos
Reis Católicos de Santiago e máis ao Parador de Santo Estevo de
Ribas de Sil, na Ribeira Sacra. Os Paradores de Alcalá de Henares,
Oropesa, Aiguablava, Cangas de Onís, Cardona, Plasencia, Cáceres e
Nerja completan o ranking.
A
directora de Turismo de Galicia resaltou que é “unha honra para
Galicia, nomeadamente para a Administración Turística galega,
contar cos dous primeiros postos nesta clasificación que premia o bo
servizo e a calidade”. Este premio, segundo dixo, recoñece o
traballo de todo o persoal implicado no establecemento e debe
considerarse un “punto de partida que dea continuidade ao traballo
realizado ata o momento e funcione como aliciente para seguir
traballando na boa dirección”.