O sábado 28 celébrase en Pontevedra o primeiro Wikimaratón do Audiovisual
martes, 24 de novembro do 2015
- Exterior da Facultade de Ciencias Sociais e da Comunicación de Pontevedr
O vindeiro sábado día 28 de novembro vaise celebrar en Pontevedra o primeiro Wikimaratón do Audiovisual.
A cita, promovida pola Academia Galega do Audiovisual e a Galipedia,
achégase cun obradoiro de introdución á edición da Wikipedia
e, tamén, de traballo para mellorar artigos ligados ao audiovisual.
Segundo informa a organización, a xornada está aberta a todos os
interesados en iniciarse na colaboración co proxecto da wikipedia
galega, a Galipedia, e será “unha boa oportunidade” para
achegármonos a este acubillo de coñecemento da man de varios dos
seus administradores.
Segundo engaden os
responsábeis da Academia Galega do Audiovisual e máis da Galipedia,
“un wikimaratón é unha reunión (presencial e virtual) convocada
para editar e mellorar colectivamente os contidos da Wikipedia sobre
un tema ou unha serie de artigos relacionados con ela”. Decote,
apuntan, adoitan estar promovidos por unha institución educativa ou
cultural -neste caso a Academia Galega do Audiovisual- e buscan
ademais visualizar a comunidade da dita enciclopedia en liña,
favorecer o contacto entre os seus membros e facilitar a
incorporación a ela de novas persoas. “Por iso é frecuente que
incorporen unha sesión introdutoria á edición básica, así como
actividades divulgativas”, engaden os organizadores.
Esta actividade terá
lugar o 28 de novembro de 2015 na Facultade de Ciencias Sociais e da
Comunicación de Pontevedra, situada no Campus da Xunqueira. Comezará
ás 10:00 e vaise desenvolver durante toda a mañá. Para poder
tirarlle todo o partido ao Wikimaratón o ideal é asistir de maneira
presencial. “Así”, explican os organizadores, “amais de
editar, é posíbel coñecer a outros wikipedistas, intercambiar
experiencias e dar visibilidade ao proxecto”.
Programa de actividades
10:00-10:30 Benvida e presentación da xornada.
10:30-11:00 Que é a Galipedia? Filosofía, principios,
organización, comunidade.
11:00-11:30 Como se edita a Galipedia? Introdución á edición co
Editor visual.
11:30-11:50 Pausa para o café.
11:50-12:00 Repaso de obxectivos de edición e distribución de
tarefas.
12:00-13:45 Edición dos artigos.
13:45-14:00 Revisión do traballo realizado e planificación do
traballo restante.