O servizo 010 de Lugo duplica comunicacións dixitais
martes, 10 de xaneiro do 2017
O Concello
de Lugo vén de facer o seu habitual reconto de actividade en
relación ao seu Servizo de Información 010, un exame e
valoración que nos serve (entre outras cousas) para pór de
manifesto o crecente emprego das novas tecnoloxías da información
como canle da comunicación da cidadanía coas súas institucións
máis próximas. Neste caso concreto, a cidadanía de Lugo. Segundo
explica o Goberno local nun plano máis detallado, o servizo
devandito leva máis de 945.000 consultas atendidas dende que entrou
en funcionamento no ano 2005, entre chamadas telefónicas e correos
electrónicos. No 2015 recibíronse preto de 57.000 chamadas e máis
de 2.100 correos electrónicos, mentres que no 2016 foron case 70.500
chamadas e preto de 4.700 correos electrónicos, entre outros a
solicitude do servizo de intérprete de linguaxe de signos para
persoas xordas.
A canle de información 010 está a día de hoxe
integrada por 4 teleoperadoras. Dende este servizo xestiónanse
cousas como avisos de atoamentos de sumidoiros, avarías no
subministro de augas, limpeza nas rúas ou “calquera tipo de
incidencia no funcionamento do servizo público”. A través deste
número tamén se informa das actividades “extramunicipais”
realizadas por entidades colaboradoras do Concello, obras de teatro,
números de teléfono ou información turística, entre outras.
O Goberno local de Lugo tamén que lembra que o
010 fornece información por outros medios, como a mensaxeiría ou as
redes sociais. Na actualidade, esta plataforma conta con dous
servizos de mensaxeiría de balde, chegando a 2.000 persoas inscritas
nos mensaxes de texto a través do teléfono móbil, e 3.500
inscritos no correo electrónico. En canto ás redes sociais, o 010
está presente en Facebook, Twitter e Youtube, contando nestes
momentos con máis de 2.500 seareiros, logrando 20.780 visualizacións
o seu perfil de Facebook no pasado mes de decembro.