OSIMGA conclúe que a presenza da banda larga en fogares con nenos aumentou no último ano
luns, 27 de outubro do 2014
Este
domingo saían á luz os principais datos do estudo feito polo
Observatorio
da Sociedade da Información e a Modernización de Galicia
(OSIMGA) sobre o estado de cousas das novas tecnoloxías na nosa
terra en relación aos menores de idade e a xuventude en xeral
(menores de idade e mozos e mozas como principais impulsores e
divulgadores das novas tecnoloxías nos seus ámbitos). Falamos
da investigación A
mocidade e as TIC.
Entre as moitas conclusións que se sacan desta análise cómpre
salientar a seguinte: que os fogares nos que se convive con nenos en
idade escolar contan cunha porcentaxe case 18 puntos porcentuais
superior á media galega en contratación de banda larga, aumentando
case 15 puntos porcentuais no último ano.
Así,
o 83,2% dos fogares galegos con rapaces de 3 a 16 anos dispón de
servizo de Internet de banda larga, fronte ao 59,8% dos domicilios
sen nenos en 23,4 puntos porcentuais. A convivencia con nenos tamén
inflúe de xeito positivo no uso de Internet nos últimos tres meses,
engádese, acadando un 78,7% neste tipo de fogares, 18,8 puntos máis
que aqueles nos que non conviven nenos en idade escolar. A metade dos
mozos galegos conéctase á Rede máis de 5 horas semanais fronte ao
36,2% de persoas de entre 35 e 74 anos.
O uso da
mensaxería instantánea, redes sociais, foros (85,5%), as descargas
ou o uso de xogos, música e películas (56,8%) así como a procura
de emprego (31,3%) a través da Rede salientan entre os servizos máis
empregados polos mozos e con máis diferenza con respecto aos
maiores.
En canto aos
trámites coa Administración a través de Internet, os mozos superan
aos maiores de 35 anos nas xestións universitarias, bibliotecas
públicas e oficinas de emprego. Estes últimos empregan a
Administración Electrónica, principalmente para xestións
sanitarias e declaración da renda.
De falarmos dos
chamados “hábitos dos nativos dixitais”, a partir do estudo
Screening do uso problemático de Internet entre os adolescentes
da comunidade galega (elaborado polo Valedor do Pobo), o horario
de tarde é o preferido polos mozos galegos para conectarse a
Internet. O 65,5% dos adolescentes galegos conéctanse a Internet
entre as 16 e as 21 horas.
E que acontece
co móbil? Pois é o dispositivo preferido para conectarse a
Internet. Un 81,2% de adolescentes galegos elixe este dispositivo e 4
de cada 10 mozos faino dende o computador portátil, sendo o fogar o
lugar preferido polos adolescentes galegos para navegar pola rede.
Como curiosidade, o 27,1% dos adolescentes galegos obtivo o seu
primeiro móbil aos 12 anos, confirmando así que os rapaces se
inician no uso das tecnoloxías a unha idade cada vez máis temperá.
E as redes
sociais? Un 93% dos adolescentes galegos/as está rexistrado en,
cando menos, unha comunidade 2.0, acadando a porcentaxe máis alta os
mozos que están rexistrados en tres ou máis redes sociais (68,8%).
Tuenti é a rede social con máis adeptos entre a nosa mocidade
(71,3% de rexistros), seguida por Twitter (65,1%) e Facebook (62,1%).
Dicir
que o
Whatsapp é a aplicación de mensaxería instantánea máis empregada
polos adolescentes galegos.
Por último, e
tirando do fío de estudo de OSIMGA (organismo adscrito á Axencia
para a Modernización Tecnolóxica de Galicia, AMTEGA) está unha das
cuestións que máis preocupación xera na sociedade, a supervisión
e os xeitos de control dos que dispoñen os pais para o acceso dos
seus fillos/as a información e páxinas web. Máis da metade dos
pais (51,1%) limitan e controlan as actuacións dos seus fillos na
Rede, lixeiramente por riba do control exercido co teléfono móbil
(48,1%).